Foto leada dae vaticannews.va
Su 15 de maju Papa Leone XIV at faeddadu, in s’Àula Nervi, a sos partetzipantes de su Giubileu de sas Crèsias Catòlicas Orientales, chi fiat in programma dae su 12 a su 14 de maju.
Su pontìfitze, in s’allega ufitziale, at ammentadu sa richesa devotzionale de custas crèsias, chi pro nàrrere, ant dadu a sa cristianidade su monachèsimu.
At agiuntu ca Leone XIII, pro primu, aiat dedicadu unu documentu a sa dignidade issoro. Non cheret ismentigadu, at sighidu su Papa, ca calicuna de custas impreat galu oe comente limba litùrgica s’aramàicu, sa limba faeddada ogna die dae Cristos e dae sos apòstolos.
No est mancadu unu riferimentu a su fenòmenu de sa diàspora de custos fideles, custrintos bortas meda a lassare sas terras issoro e a cantu siat importante pro issos sighire a pregare segundu sas traditziones issoro:
«Pedo a su Dicasteru pro sas Crèsias Orientale, chi ddi torro gràtzias pro su traballu suo, a m’agiuare a definire printzìpios, normas e lìnias ghia, chi sos pastores latinos potzant agiuare in cuncretu sos catòlicos orientales de sa diàspora».
Su mundu orientale podet èssere un’esèmpiu de pònnere in fatu pro sas Crèsias de otzidente:
«Cantu bisòngiu tenimus de recuperare su sensu de su mistèriu, de gasi biu in sas liturgias bostras».
Leone XIV at fatu in fines unu riferimentu a sa situatzione mala de sos cristianos de s’Oriente Mèdiu, siat latinos siat orientales, vìtimas de discriminatziones e a bortas de persecutziones puru:
«A sos cristianos siat dada sa possibilidade, no a paràulas ebbia, de abarrare in sa terras issoro cun totu sos deretos chi ddoe cheret pro un’esistèntzia segura».
A intro de sa Crèsia catòlica ddoe sunt 24 Crèsias Orientales sui iuris, cun 7 diferentes ritos, armenu, bizantinu, coptu, etìope, siru-otzidentale (antiochenu), siru-orientale (caldeu) e siru-maronita e 5 diferentes traditziones printzipales.
(gianni muroni)
Leave a comment