Aprovadu su calendàriu iscolàsticu

Habemus calendarium. Pro s’annu iscolàsticu 2025/26 sa Giunta regionale at aprovadu sas datas de iscola, e duncas finas sas de vacàntzia: si comintzat su 15 de cabudanni; si serrat s’8 de làmpadas. Custas sas suspensiones pro sas festividades natzionales fissadas dae sa normativa istatale: totu sas domìnigas; sa prima die de santandria (is santos); s’8 de nadale (sa Purìssima); su 25 de nadale (pasca de nadale); su 26 (santu Istèvene); sa prima die de ghennàrgiu (prima die de s’annu); su 6 (sos tres res); sa die de pasca de abrile e su lunis de pasca; su 25 de abrile (sa liberatzione); sa prima de maju (festa de su traballu); su 2 de làmpadas (festa de sa Repùblica); sa die de sa festa de su patronu (si ruet in die de iscola). In prus sas suspensiones de nadale dae su 23 a su 31 e dae su 2 a su 5 de ghennàrgiu; su 17 de freàrgiu (martis de carrasegare); dae su 2 a su 4 de abrile (vacàntzias pascales); su 28 de abrile (sa die de sa Sardigna). Custu calendàriu balet pro totu sas iscolas de cada òrdine e gradu, ma sas atividades de sas iscolas de sa pitzinnia sessant su 30 de làmpadas. Sa determinatzione de su calendàriu de sas festividades natzionales e de sos esames est de cumpetèntziaistatale. Cun sa deliberatzione si providet duncas a formulare su calendàriu regionale pro permìtere sa programmatzione didàtica de sas istitutziones iscolàsticas autònomas, sa predispositzione de sos servìtzios de cumpetèntzia de sos Entes locales e s’organizatzione de sa vida familiare. S’in casu b’apat esigèntzias, e semper acordende·si in antis cun sos entes territoriales cumpetentes pro assegurare sos servìtzios pro su diritu a s’istùdiu , sas istitutziones iscolàsticas podent deliberare s’antìtzipu de sa data de comintzu de sas letziones. Su calendàriu aprovadu istabilit una durada de 204 dies (203 si su patronu ruet in die de iscola).