S’est rèndida oe una de sas figuras prus de importu de sa manca internatzionale contemporànea. José “Pepe” Mujica aiat 90 annos galu a los lòmpere e finas a deghe a como, dae su 2010, fiat su presidente de s’Uruguay. S’annùntziu l’at dadu su presidente atuale Yamandú Orsi: «Cun dolore fundudu comunicamus sa dispedida de su cumpàngiu nostru Pepe Mujica – at iscritu in X –. Presidente, militante, puntu de riferimentu e ghia».
In antis de èssere presidente, Mujica at fatu parte de su movimentu de liberatzione natzionale de sos Tupamaros dae sos primos annos 60. A Mujica nche lu pongeint in presone dae su 1972 a su 1985. S’annu de su golpe de Juan Maria Bordaberry a Mujica nche lu giugheint a una presone militare comente rehenes, est a nàrrere ostàgiu, comente persone de fusilare in casu de àteras atziones dae parte de sos cumpàngios suos Tupamaros. Cun sa torrada de sa democratzia costitutzionale, a Mujica lu libereint gasi comente fadeint pro àteros gherrilleris (ma finas pro sos golpistas).
Coladu carchi annu fundeit, cun àteros dirigentes Tupamaros, su Movimentu de partetzipatzione populare in intro de sa coalitzione de su Fronte ampru. Su 1994, candidadu in Montevideu, nche lu setzeint che a deputadu. A pustis de una parèntesi comente senadore, dae su 1999, a Mujica li deint incàrrigu ministeriale (cun dèlega a s’allevamentu) in su guvernu de Tabaré Vázquez. Intre sos ministros prus carismàticos, Mujica comintzat sa caminera sua conca a sa presidèntzia de su paisu, sa de 40. Binchet su 2009 e est presidente dae su primu de martzu de su 2010 a sa matessi die de su 2015. De su guvernu suo sunt ammentende tres conchistas in particulare: s’istitutzione de sa coja omosessuale; sa legalizatzione de sas drogas lèbias; una lege noa in contu de abortu. Connotu pro s’istile suo pàsidu e sòbriu, Mujica at lassadu sa polìtica sos ùrtimos annos.
Gianfranca Orunesu
(Foto dae Wikimedia Commons)
Leave a comment