At comintzadu s’allega sua in inglesu, paba Leone XIV, oe, in dae in antis de is operadores de sa comunicatzione sètzidos in s’àula de Pàulu VI pro un’udièntzia. Non b’est su tantu de nàrrere chi su pontèfitze nou apat istèrridu unu tratadu de deontologia professionale, ma chi nche siat intradu a su coro de unas cantas chistiones emmo. E l’at fatu mentovende a Cristos cando nargeit «Biados sos operadores de paghe», belle isterrende unu ponte (àtera paràula sua) intre su chi at naradu su sero de s’8 acarende·si a pratza e su tema odiernu. «Est unu disafiu pro tu cantos semus e chi bos pertocat dae curtzu», lis at naradu inditende «s’impignu de nche giùghere a dae in antis una comunicatzione diferente, chi non chircat su cunsensu a morte segada, chi non si bestat cun paràulas de assàchiu, chi no andat a manu tenta cun su modellu de sa cumpetitzione, chi mai partzit sa cherta de sa veridade dae s’amore chi bi ponimus cun umiltade chirchende·la». «Oe – at annantu – unu de sos disafios prus de importu est su de promòvere una comunicatzione a tretu de nos nche fàghere essire dae sa “turre de Babele” in ue, a bortas, istamus, dae s’abbolotu de limbàgios privos de amore, a s’ispissu ideològicos e de parte. Pro custu su servìtziu bostru, cun sas paràulas chi impreades e su tràgiu sighidu, est prus chi no importante». A bisu de paba Prevost, «sa comunicatzione no est petzi una trasmissione de informatziones, ma fintzas a creatzione de cultura, de ambientes umanos e digitales chi siant ispàtzios de diàlogu e de cunfrontu». Duncas «non serbit una comunicatzione fragorosa, prus a prestu una chi iscat iscurtare, collire sas boghes de is dèbiles chi boghe no ant. Disarmemus sas paràulas pro contribuire a disarmare sa terra. Una comunicatzione disarmada e chi disarmet nos permitit de cumpartzire una mirada diferente a su mundu e de agire in forma coerente cun sa dignidade nostra umana».
mauro piredda
Leave a comment