A sas oto de istasero sa Torres at a andare in campu contra a s’Atalanta U-23 pro si conchistare unu logu pro sa sèrie B. Comente s’annu coladu est rennèssida a intrare in sos playoff pro bìnchere su logu galu lìberu pro pigare in su campionadu prus artu. Custa borta in unu momentu prus a dae in antis, ca est lòmpida in sa positzione tertza e non comente s’istajone 2023/2024 chi fiat segunda.
S’Atalanta U-23 est s’iscuadra de sos giòvanos de s’Atalanta chi giogat in sèrie A e chi ocannu at balangiadu su logu pro andare in sa Champions league. Est lòmpida a sa positzione de oto in su girone suo, cussu de su nord Itàlia, s’ùrtimu logu ùtile pro fàghere sos playoff. Mancari fiat tzucada comente pagu favorida, at bìnchidu contra a Trento e Albino Leffe chi in s’istajone regulare fiant lòmpidas a subra de issa.
S’aversàriu de sos tataresos, tando, est perigulosu e s’iscudra de Alfonso Greco depet atuare a giogadores chi sunt fatende goal maicantos, comente Vanja Vlahovic chi in 32 partidas a postu sa botza a dae segus de su portieri 21 bortas. Est beru chi sa Torres est prus frisca, ca no at dèpidu giogare sa fase a girones, ma custu podet èssere unu problema, ca no at sas ancas e sos pees caentes. Però su chi at a fàghere sa diferèntzia at a èssere sa conca. E fintzas inoghe b’at arriscos, ca sos lombardos ant balangiadu seguresa e atza in custa chida de bìnchidas, sos tataresos a s’imbesse podent èssere galu cun sa conca a s’annu coladu.
Sa proa est manna, tando, e oe sos tataresos giogant fora de domo, in Bèrgamo, cun s’istàdiu contra. Dae istorbos mannos, podent nàschere capatzidades noas e custu est s’isetu de sos tifosos, chi dae cando est cambiada sa propriedade sunt sonniende sa pigada a sa sèrie segunda semper cun prus ispera. Comente si siat chi siat, oe est petzi s’andada, sa torrada at a èssere a su Vanni Sanna mèrcuris su 14 de custu maju.
Gabriele Tanda
Leave a comment