Naschet «cun sa voluntade de contare s’istòria de unu territòriu» s’eventu “Ammenta, mùsica e curtura in Bidda” organizadu dae s’assòtziu “S’Orcu ‘e Montiarvu” e programmadu pro su 17 de maju in Thiniscole. Su die, dae mangianu finas a note, b’ant a èssere unu dibàtitu, unu cuntzertu, mustras e laboratòrios in intro de sa corte Sinis-Mele, a pagu tretu dae sa pratza de Sant’Antoni ‘e su ‘ocu.
Su comintzu est pro sas 11 cun s’abertura de chimbe stand: sos meres de domo de s’Orcu (cun bìsitas ghiadas in s’àrea museale temporànea e cun sa projetzione de su metràgiu curtzu omònimu dirìgidu dae Antoni Conzu); s’Acadèmia de sa mùsica sarda (cun una mustra e duos laboratòrios pro s’aprontu de istrumentos musicales sardos istòricos); sa libreria Cose di Carta (cun testos de literadura thiniscolesa e sarda); Emergency; s’Associazione italiana Tromboastenia di Glanzmann. In prus b’at fintzas una mustra chi pertocat s’istòria musicale de sa bidda baroniesa cun fotografias inèditas, vìdeos, artìculos, locandinas istòricas e ogetos.
Totu custu ca Thiniscole est sa bidda nadia de grupos istòricos de s’iscena rock isulana (comintzende dae Kenze Neke e Askra). Ca est fintzas su logu in ue b’ant fatu fèstival de importu; ca bi durat su connotu de su càntigu a tenore; ca non sunt mancados e mancu como bi mancant sos iscritores; ca bi resistet su carrasegare antigu cun essidas ierriles ebbia. A sas 11.30 comintzat s’arresonada cun sos saludos de Luca Derosas (presidente de s’Orcu) e sos interventos de Claudio Roccia (bassista de sos Kenze Neke), Marco Cau (boghe e chiterra de sos Askra), Domenico Carta (contra de su tenore Luisu Ozanu), Tonino Asproni (cantore de su coro polifònicu Montalbo), Fabio Coronas (chi faeddat de iscritura de testos de protesta e de s’istòria de sos fèstival in Thiniscole).
S’arresonada, antitzipada e serrada dae sas cantadas de su Coro Montalbo, l’at a introduire e a moderare su giornalista e tradutore Mauro Piredda. A sa una b’est imbetzes su pràngiu pro sos bisitadores, semper a s’incuru de S’Orcu ‘e Montiarvu. Dae sas bator finas a mesunote b’est, in fines, su cuntzertu cun su tenore Usùsule (su primu grupu in su palcu), Manuella (a sas 16.45), Qvaalude (a sas 17.45), Nugoro Rude (a sas 19.15) e Nesika (a sas 21.30). Custu ùrtimu progetu (nou) movet dae s’esperièntzia de sa band locale I Saluti e si presentat cun su discu de esòrdiu cun testos in sardu e in italianu.
Subra de su palcu finamentas unos cantos òspites ispetziales comente sos giai mentovados tenore Ozanu e coro Montalbo, Marco Cau e Claudio Roccia, sos cumponentes de Kenze Neke e Askra Sandro Usai e Luciano Sezzi, sos ex I Saluti Luca Solinas, Luciano Pau e Alessio Spanu, Manuela Manca e Siria Cau. Sa serrada est afidada a Radio Zoo Dj Set. «Nos auguramus – afirmant sos assotziados de s’Orcu – de colare, in pare a chie b’at a èssere, una die de cultura, de ammentos e de mùsica galana. Est pro cussu chi su fèstival si narat Ammenta, pro no ismentigare su patrimòniu istòricu e culturale de sa comunidade».
Gianfranca Orunesu
Leave a comment