Lugherras est unu de sos nuraghes medas chi b’at in su cumonale de Paùlle. Est unu nuraghe polilobadu e monoturre, chi tenet su nùcleu suo in su bastione tzentrale, cun un’architrave tziclòpica e duas càmeras postas a subra a pare, chi nche torrat a su tempus de su Brunzu Mesanu (1600 – 1300 a.C.). In tames si pensat chi nche torret a su tempus de su Brunzu Reghente (1300 – 1150 a.C.), duncas ad una fase chi benit a pustis de sa tzivilidade nuràgica, su bastione trilobadu chi ant fraigadu a inghìriu de su nuraghe tzentrale, e chi inserrat una corte defensada dae una turrita. Totu su cumplessu trilobadu est inghiriadu dae un’antemurale pentagonale cun bator turres. A probe a su nuraghe b’at una tumba de sos gigantes, cun un’istele rara cuadrangulare.
Su nuraghe l’ant impreadu finas in sos tempos de sos cartaginesos, (VI sèculu – 238 a.C.) e de sos romanos (238 a.C. – 456 p.C.), cando in pitzu b’ant fraigadu unu templu dedicadu a Demetra e Kore.
In su 1906 ant cumintzadu sos iscavos, chi ant bogadu a pìgiu uan cantidade manna de repertos, comente brùsia-profumos, soddos pùnicos e romanos, istatueddas e, mescamente, lugherras votivas de terra lugiana chi rapresentant sa figura feminile, dae ue benit su nùmene etotu de su nuraghe.
