Foto leada dae vaticannews.va
Oe 7 de maju a sas 16,30 cumintzat su Conclave pro s’eletzione de su de 267 Papas de sa Crèsia Catòlica.
Sos 133 cardinales eletores, est a nàrrere sos chi non nch’ant coladu sos 80 annos, ant a intrare duncas in sa Capella Sistina de su Palatzu Apostòlicu e a sas 19,39 amus a ischire si giai in custa prima die ant a àere elègidu unu Pontìfitze nou, cunforma a su colore de su fumu, biancu o nieddu, chi at a essire dae su fumajolu.
Custu mangianu a sas 10,00 ant tzelebradu in sa Basìlica de Santu Pedru sa Missa pro eligendo pontifice. Dd’at presèdida su cardinale Giovanni Battista Re, decanu de su Cullègiu Cardinalìtziu, cun sos 91 annos suos de edade.
In sa prèiga Re at naradu ca sos cardinales intendent sa presèntzia de totu su pòpulu de Deus chi isetat cun fide e in prus: «Semus inoghe pro invocare s’agiudu de s’Ispìritu Santu, pro implorare sa lughe e sa fortza Sua, pro chi siat elègidu su Papa chi sa Crèsia e s’umanidade tenent bisòngiu in custa furriada de s’istòria tantu traballosa, complicada e tribulada».
At agiuntu ca s’eletzione est «un’atu umanu chi tocat a lassare a unu chirru ogna pensamentu personale e tènnere in conca e in su coro petzi su Deus de Gesucristu e su bene de sa Crèsia e de s’umanidade».
At marcadu finas sa diferèntzia cun àteras istitutziones umanas: «S’eletzione de unu Papa no est unu càmbiu de persone ebbia. S’eletzione de unu Papa nou est semper s’apòstolu Pedru chi torrat».
Su cardinale Re at fatu finas unu riferimentu a su logu seberadu pro elègere sos Papas, mentuende a Giuanne Pàule II, chi s’auguraiat chi in sas oras de su votu sa figura de Deus giùighe, chi faghet parte de sos afrescos chi Michelangelo aiat pintadu sa Capella, esseret ammentadu a sos cardinales sa responsabilidade de pònnere sa ghia de sa Crèsia in sas manos giustas.
(gianni muroni)
Leave a comment