Foto leada dae su situ ufitziale de George Simion georgesimion.ro
Domìniga 4 de maju sos rumenos ant votadu in su primu turnu de sas eletziones presidentziales. A otènnere prus votos est istadu su candidadu de destra George Simion, de s’AUR (Alleàntzia pro s’Unione de sos Rumenos) chi aiat leadu su postu de Georgescu, postu foras de giogu dae sa Corte Costitutzionale .
Simion at leadu su 40,9%. S’aversàriu suo in su ballotàgiu de su 18 de maju at a èssere Nicuşor Dan, sìndigu de Bucarest, tzentrista de s’USR (Sarvamus s’Unione de sa Romania), chi at otènnidu su 20,9% de sos sufràgios.
Abarrat foras su candidadu de sa coalitzione guvernativa Crin Antonescu, de su Partidu Natzionale Liberale, chi est istadu votadu dae su 19,97% de sos eletores.
Pròpiu custu resurtadu negativu at cajonadu sas dimissiones de su primu ministru Marcel Ciolacu. Cheret nàrrere ca sos tzitadinos rumenos, a prus de seberare su presidente como a presse, ant a dèpere finas seberare unu guvernu nou in eletziones antitzipadas.
Cheret signaladu ca pro su chi pertocat su votu èsteru, sos rumenos residentes in Itàlia ant votadu pro su 73,66% pro Simion. Finas sas comunidades de emigrados in su restu de s’Europa otzidentale ant espressadu sa preferèntzias issoro pro su candidadu de sa destra.
Pro sa polìtica èstera, unu de sos puntos firmos de su programma polìticu de George Simion est s’annessione de sa Moldàvia.
Simion at decraradu ca «su pòpulu rumenu at faeddadu. Est ora chi nos ascurtent! Est istadu prus de unu sèberu: est istadu un’atu de coràgiu, de fide e de unidade. Est sa vitòria de chie creet in una Romania lìbera, rispetada e soberana».
A custu puntu ddo’est sa possibilidade chi torret in campu Georgescu. Simion at naradu ca «ddo’at diferentes maneras, si su pòpulu rumenu cheret, chi Georgescu podet istare in positziones de cumandu, e ddas amus a usare. Podimus formare una majoria e ddu fàghere primu ministru; podimus tènnere eletziones antitzipadas o podimus cunvocare unu referendum».
(gianni muroni)
Leave a comment