Mancat galu carchi die pro s’addòbiu de sos cardinales. Dae su chi disinnant sos porporados at a essire su nùmene de su paba nou. Ma in antis de su nùmene est su fumu chi dat s’inditu de s’acòrdiu agatadu pro s’eletzione de su cabu de istadu, de su monarca (ca mancari eletiva, sa forma de istadu vaticana est monàrchica e assoluta). Dae ue nd’essit custu fumu chi bidimus dae sa columìngiu de sa Capella Sistina? Dae un’istufa in ghisa. S’in casu b’aeret fumadas nieddas est ca in intro de cussa istufa b’ant brusiadu sas ischedas cun percloradu de potàssiu, antràtzene e sùrfure. E pro chi sa fumada siat arba? A sas ischedas b’annanghent cloradu de potàssio, latòsiu e colofònia, una rèsina vegetale groga, sòlida e trasparente chi li narant finas pighe greca. Cun custa casta de fumadas paba est eletu. Est dae su 1914, cando elegeint a Beneitu XV, chi impreant ambos fumos pro chi nono o pro chi eja. S’istufa chi b’ant como l’impreeint sa prima borta in su conclave de su 1939 pro nche sètzere a Piu XII e gasi pro sos pabas in fatu suo: Giuanne XXIII su 1958; Pàulu VI su 1963; Giuanne Pàulu I e Giuanne Pàulu II su 1978; Beneitu XVI su 2005; Frantziscu su 2013. Dae pagu ant introduidu un’àtera istufa (sunt duas, ma cumpartzint sa matessi canna fumària) pro mègius “colorare” su fumu, sende chi carchi borta sa fumada non fiat crara e sos singiale cheriant interpretados. E dae pagu est fintzas chi sonant sa càmpanas. De ogni manera, si sos ogros sunt indiritzados a su fumu e sas origras a sas càmpanas, ambos duos isetant su momentu prus solenne, cando su cardinale protogiàganu fòrmulat su “Annuntio vobis gaudium magnum, habemus Papam!” in antis chi s’acaret su sutzessore de Frantziscu. Mancat pagu, dae su 7 de maju su conclave si reunit pro dare a sa santa sede unu pastore pro sa gama cristiana. E dae tando amus a bìdere comente at a fumare su columìngiu.
immàgine: https://upload.wikimedia.org/wikipedia/commons/2/20/Fumo_branco.jpg
Leave a comment