Su PM de Gènova Walter Cotugno, su chi at sighidu su protzessu pro su disacatu de su ponte Morandi, ispreculende comente mai sa cumpannia Tirrènia non fiat controllada pro su chi pertocaiat sas règulas de s’ambiente, at agatadu 35 mìgia billetes dados a indonu a politziotos, carabineris, finantzieris e funtzionàrios artos de sas istitutziones e de sas Prefeturas. Su suddidu est chi sos chi depiant compidare sos navios de sa cumpannia, beniant currùmpidos cun biàgios a Sardigna e Sitzìlia.
Sunt tzucadas, tando, duas inchestas a subra de sa Tirrènia de Onorato e prus sunt andende a dae in antis prus sunt essende a campu nùmenes. Pro sa prima sa Procura de Gènova at secuestradu tres traghetos, cun unu balore de 64 milliones de èuros, e at postu tres persones de sa cumpannia in sos arrestos in domo. Dae su chi narat Ansa, billetes a indonu nd’àpidu Beppe Grillo e su fìgiu Ciro, su chi est a suta de protzessu a Tèmpiu e fintzas Cristian Solinas su Presidente de sa Regione Sardigna betzu. A s’inghitzu sos indagados fiant trèighi ebbia, ma b’at s’arriscu chi sa cantidade potzat crèschere in presse, ca b’at una lista de una barantina de persones interessadas.
Sa teoria de s’acusa est chi Achille Onorato, erederi de Vittorio e ghia de su grupu Tirrènia-Cin, potzat àere fraigadu unu “meccanismo corruttivo impressionante” in ue cumbinchiat sos chi la depiant compidare, ma fintzas chi depiat sèberare in sos ambientes polìticos sos agiudos e sas cunditziones de continuidade territoriale. Difatis, francu su Presidente Solinas, chi no est indagadu, un’àteru chi est mentovadu in sos documentos est Roberto Isidori, vitze ghia de su gabinete de su Ministru Matteo Salvini. Est craru chi semus a s’incumintzu de unu caminu longu, e non s’ischit ite nde potzat essire, ma sas acusas sunt graes meda.
Gabriele Tanda
Leave a comment