Foto leada dae su situ ufitziale de su Partidu Liberale canadesu liberal.ca
Su 28 de abrile in Cànada si sunt tzelebradas sas eletziones federales. Sos canadesos ant duncas elègidu sos rapresentantes issoro, a pustis sa essida de iscena de s’ex Primu Ministru Trudeau, chi su 14 de martzu coladu aiat lassadu s’incàrrigu a su cumpàngiu de partidu , su liberale, Mark Carney.
Sos canadesos elegent sa Càmera bassa a sufràgiu universale, mentras sos rapresentantes de su senadu sunt nominados dae su Guvernadore Generale, a inditu de su Primu Ministru.
Su partidu liberale at bintu cun su 43,7% de sas ischedas e 169 rapresentantes. Segundu est arribadu su partidu cunservadores, cun su 41,3% de sas preferèntzias e 144 deputados. A tretu meda sos àteros partidos. Su Bloc Québécois, su de tres prus votadu, at leadu 22 sègios e su 6,3%.
Su votu at cambiadu sas chi pariant sas intentziones de votu in sas inchiestas preeletorales. Su Partidu Cunservadore pariat seguru de sa vitòria. A pàrrere de paritzos cummentadores a furriare de su totu custa tendèntzia sunt istadas sas decraratziones de su presidente americanu Trump de chèrrere fàghere de su bighinu setentrionale su de chimbantunu istadu de sos USA.
Custu, agiuntu a acusas de aprofitare de sos Istados Unidos a livellu de iscàmbios cummertziales at ischidadu su patriotismu de sos canadesos, chi a su sòlitu sunt bene intentzionados cun sos americanos.
Giai carchi signale s’est bidu in manifestatziones isportiva intre sas iscuadras de sos duos istados, pro nàrrere sos campionados de hockey NHL e de basket NBA, in ue su pùblicu de domo at fruschiadu s’innu natzionale americanu.
Cun Mark Carney est possìbile chi su Cànada torret a istrìnghere sos ligàmenes cun su Regnu Unidu. Su Primu Ministru, 60 annos, de ratza irlandesa, est istadu, a prus de Guvernadore de sa Banca Tzentrale Canadesa, Guvernadore de sa Banca de Inghilterra. Sa mugere, Diana Fox, est inglesa.
(gianni muroni)
Leave a comment