Sa de chimbe Cungregatziones Generales de sos cardinales de sa Crèsia Catòlica, chi s’est tzelebrada lunis 28 de abrile, at detzìdidu sa die chi at a cumintzare su Conclave pro s’eletzione de su Papa: at a èssere mèrcuris 7 de maju.
Sas Cungregatziones Generales sunt addòbios de sos cardinales chi in custu tempus de sede vacante si preparant a seberare su Summu Pontìfitze. In prus sos prelados chistionant de totu sos problemas pràticos chi si presentant pro s’amministratzione de sa Crèsia in custu interregnu.
Podent presentziare totu sos cardinales, incruidos sos chi, pro resones de edade, est a nàrrere passados sos 80 annos, no ant a pòdere partetzipare a s’eletzione.
A pustis de sa morte de s’ùrtimu pontìfitze, su lunis de Pasca coladu, 21 de abrile, sa prima Cungregatzione s’est tzelebrada sa die in fatu, su 22.
Segundu su comunicadu ufitziale pro sos giornalistas, in sa de chimbe Cungregatziones ant rinnovadu puru sa cumpositzione de sa Cungregatzione Particulare de sos tres assistentes de su Camerlengo, su cardinale Farrell.
Ant cunfirmadu a su cardinale tedescu Reinhard Marx, comente coordinadore de su Cussìgiu pro s’Economia, e ant tiradu a sorte sos àteros duos chi sunt su cardinale filipinu Luis Antonio Tagle e su cardinale frantzesu Dominique Mamberti.
Su 7 de maju sa die de sos purpurados at a cumintzare in sa Basìlica de Santu Pedru. In ie a mangianu ant a fàghere sa missa pro eligendo Romano Pontifice. A coa ant a andare a sa Capella Sistina, in ue ant a cumintzare sas operatziones de votu.
Custas dies chi benint ant a cumintzare finas sos traballos pro assentare pròpiu sa Capella pro dd’aprontare pro sas votatziones.
Sas Cungregatziones, sighit su comunicadu, s’ant a riunire ogna mangianu, finas a su 7, die de su cumintzu de su Conclave, francu sa prima die de maju e domìniga 4 de maju.
(gianni muroni)
Leave a comment