Dae martzu a oe est capitadu sete bortas chi s’acuedotu Coghinas 2 s’est segadu lassende totu su territòriu de Tàtari, Portu Turre e àteras comunas sena abba in sos grifones. Su tubu fraigadu in tzimentu pressadu chimbanta e prus annos a como, est totu guastu e no est resessende a barigare sa pressione de s’abba e de sos acontzos. Pro custa resone sa Regione, in paris cun Abbanoa e s’ENAS, at aprontadu traballos mannos in sa retza impitende sos fundos de su PNRR, ma fintzas a pagu tempus a como sena faeddare cun sos sìndicos de su territòriu.
Su problema, difatis, est de s’istrutura prus de importu pro s’ammanìgiu de s’abba in su nord Sardigna chi batit s’abba dae su Coghinas a sos potabilizadores. S’ENAS aiat in programma custos traballos dae maicantu e pro custu aiat postu a banda s’abba de su lagu Cuga, cun chèscias de sos massajos e de su mundu de sas campagnas. Como si cumprendet su pro ite: su Cuga serbit pro su bisòngios umanos de su nord-ovest, finamentas chi su Coghinas abarrat aoradu dae sa retza.
S’annicu de sa populatzione fiat andende contra a sos amministradores, chi però aiant sas informatziones dae Abbanoa, chi aiat sas noas dae S’ENAS. Unu caminu longu e a s’ispissu pagu e nudda profetosu. Cun sas riuniones de custas dies, chi ant a andare a dae in antis fintzas a su 30 de su mese, sos entes ant seberadu de fraigare unu fronte comune, pro sustènnere a su mègius chi si podet sos tzitadinos.
Ca sos problemas, a dolu mannu, ant a andare a dae in antis fintzas a su martzu de s’annu chi benit, cando sos traballos ant a agabbare de su totu. Giai dae como sa Regione at postu 10 iscuadras pro allestrare sos tempos, in logu de sas duas de prima. ENAS at naradu fintzas chi est sestende maneras pro minimare sos infados, chi però ant a sighire.
Gabriele Tanda
Leave a comment