S’intelligèntzia artifitziale intrat a iscola. In ue? Comintzamus dae sa Tzina. A sos istudiantes de sas primàrias e de sas segundàrias lis tocat duncas a imparare a connòschere sos chatbot, sa tecnologia e s’ètica issoro. Ma no a totu cantos, pro como. Su ministeru de s’istrutzione de su gigante at individuadu 184 iscolas comente istitutos pilota, e su titulare de su dicasteru Huai Jinpeng at naradu chi s’IA est sa crae de oro pro su tempus benidore de s’istrutzione de su Paisu.
In Europa sa natzione chi est faghende unu progetu simigiante est s’Estònia chi, dae pagu, at annuntziadu su programma AI Leap 2025 pro s’annu iscolàsticu nou imbeniente. In su Paisu bàlticu ant a èssere interessados 20mìgia istudiantes e 3mìgia insegnantes. «Semus aberende unu capìtulu nou in s’isvilupu de su sistema educativu nostru – at naradu su presidente de sa repùblica Alar Karis -. S’intelligèntzia artifitziale at cambiadu su mundu de su totu e in forma permanente. E che a totu sos setores, fintzas su sistema educativu si devet adatare».
E in aterue? In Cànada e in Corea de su Sud ant introduidu libros de testu chi movent dae s’IA e programmas de agiudu pro sos insegnantes. In su Rennu Unidu ant imbetzes inauguradu una classe sena maistru; sos istudiantes britànnicos interessados impreant visores pro sa realidade aumentada e prataformas dèghidas de IA. In generale est però sa prudèntzia sa chi regnat, e fintzas sas Natziones unidas ant naradu a craru chi b’at arriscos mannos si non si ponent a tzentru de custas atziones s’umanidade e s’amparu de sos minores. Medas sunt sas incògnitas e de importu rilevante sunt sos disafios èticos e sas chistiones ligadas a sa seguresa. Tocat de cumprèndere comente s’at a mòvere s’Europa e, prus a curtzu a nois, s’Itàlia. In ue sunt pensende a sa religione e a sas poesias a memòria.
Gianfranca Orunesu
Leave a comment