Cando est chi una rivolutzione ruet in su calendàriu? Pro ite afestamus su 28 de abrile?

Cando est chi una rivolutzione ruet in su calendàriu? Est una dimanda custa chi sa risposta bi la podimus dare dende un’abbaidada a s’istòria colada. Si chircamus sa rivolutzione frantzesa nois tenimus sa data de su 14 de trìulas. Su die assachieint sa presone de sa Bastìllia e, mancari s’eventu non fiat de sos prus de importu de totu su protzessu (pro nàrrere, su 9 de trìulas proclameint s’Assemblea natzionale costituente e su 4 de austu aboleint su feudalèsimu interrende·nche s’Ancien Régime), cussa data nos la contant comente su comintzu de cussa rivolutzione. E galu oe est festa natzionale in Frantza. Si imbetzes abbaidamus a sa rivolutzione russa, nois ischimus chi sa die sua est su 25 de santugaine de su 1917 (cunforma a su calendàriu giulianu), est a nàrrere cando assachient su Palatzu de ierru. Paret chi s’assàchiu siat su critèriu pro fissare una data, mancari chi in Rùssia sa rivolutzione la comintzeint su mese de freàrgiu. E de ogni manera semus faeddende de duas rivolutziones vitoriosas. In Sardigna a concruos de su ‘700 no amus bìnchidu, ma custu non cheret nàrrere chi non b’at àpidu una rivolutzione. Forsis si aìamus bìnchidu est capatze chi sa Regione aiat pòdidu seberare un’àtera data e non sa de su 28 de abrile, ma una a pustis, pro seguru s’intrada triunfale de Giommaria Angioy in Casteddu. Unu pagu comente sa rivolutzione cubana chi no l’ammentant su 26 de trìulas, cando su 1953 assachieint su cuartieri Moncada, ma su primu de ghennàrgiu, cando su 1959 Fidel Castro, Che Guevara e àteros intreint in triunfu in L’Avana. Làstima chi Angioy s’est firmadu in Aristanis s’8 de làmpadas de su 1796. Est pro cussu chi in Sardigna, mancari no amus bìnchidu comente in Frantza, Rùssia e Cuba, afestamus su comintzu de sa rivolutzione su 28 de abrile de su 1794. Forsis cussa die sos populanos casteddajos nemmancu si sapeint de l’àere abertu sa ghenna. Ma custa est s’istòria.