Sos rapresentantes diplomàticos de Istados Unidos e Rùssia sunt traballende pro fàghere finire sa gherra in Ucràina. Su ruolu de s’Unione Europea est segundàriu si no addiritura assente de su totu.
Est s’amministratzione Trump chi est mandende a in antis sas tratativas sena de peruna intermediatzione. S’òmine imbiadu dae su presidente americanu est Steve Witkoff. Giai nominadu Imbiadu Ispetziale pro sos Istados Unidos in Oriente Mèdiu, Witkoff, impresàriu e avocadu, est, finas sena de tènnere unu ruolu ufitziale, su rapresentante diplomàticu de sos USA in sa chistione russo-ucràina puru.
A pustis de s’èssere giai atopadu cun sas càrrigas prus artas de sa Federatzione Russa, incruidu Putin, Witkoff at a torrare a Mosca istechida. In s’ìnteri ddo’at a àere atopos intre sos americanos e sos europeos in Londra.
A pustis de àere fatu a cumprèndere ca sos USA non sunt interessados a sighire a mandare armas e agiudos econòmicos a su regime de Zelensky como semus arribados a sa fase de sas propostas cuncretas.
Sos istadounidenses sunt dispostos a reconnòschere in bia ufitziale s’apartenèntzia de sa Crimea a sa Rùssia. Sa penìsula est de facto russa dae su 2014 a pustis de unu referendum chi sos abitantes ant detzìdidu de lassare s’Ucràina.
Su presidente Putin est oferende dae parte sua de firmare sas operatziones militares in ue sunt como, in sa lìnia de su fronte. Sas bator regiones de s’Ucràina orientale chi sunt pro su prus suta controllu russu diant abarrare pro forma a s’Ucràina mantenende però sa presèntzia de sos sordados de Mosca, sena de un’annessione ufitziale, nessi pro como.
Su presidente ucràinu Zelensky at giai espressadu su pàrrere negativu a sa proposta narende ca «sa Crimea est territòriu nostru. Territòriu de su pòpulu ucràinu».
Una decraratzione sìmile benit dae Kaja Kallas puru. S’Artu Rapresentante de s’Unione Europea pro sos Afàrios Èsteros at naradu ca diat èssere un’errore de sos americxanos ca sa «Crimea est Ucràina».
(gianni muroni)
Leave a comment