Est una data de importu sa chi ruet in die de oe. In su 1592, difatis, naschiat Wilhelm Schickard, inventore e matemàticu tedescu chi at lassadu un’ormina nòdida in s’istòria de s’informàtica e de sas carculadoras mecànicas. Schickard at rivolutzionadu sa manera de aprontare càrculos cumplessos, ponende sas bases pro s’isvilupu de sos dispositivos de càrculu modernos.
Nàschidu in Herrenberg (Germània), a Schickard lu connoscheint pro su lugore de s’intelligèntzia sua e s’interessu, dae cando fiat giovaneddu, pro sa matemàtica e s’iscièntzia.
A pustis de àere frecuentadu s’Universidade de Tübingen, si dedicheit a s‘istùdiu de sas propiedades matemàticas e mecànicas cun s’obietivu de fatzilitare sos càrculos ripetitivos e laboriosos. In su caminu acadèmicu suo, si distingheit pro s’originalidade e sa capatzidade de coniugare sa teoria cun s’isperimentatzione: calidades chi essiant a campu finamentas in s’àmbitu de su càrculu.
In su 1623, Schickard costrueit – a pustis de l’àere progetada – sa prima carculadora mecànica funtzionante connòschida comente “Calculating Clock”. Custa màchina impreaiat rodas dentadas e ingranàgios; teniat unu sistema de registratzione de sas operatziones e podiat esecutare additziones, sutratziones, moltiplicatziones e divisiones a manera automàtica. Su traballu de Schickard at ispiradu iscientziados e inventores: pensemus a Blaise Pascal o Gottfried Wilhelm Leibniz chi isvilupeint àteras carculadoras mecànicas in su XVII sèculu.
Sa vida sua s’istudeit a 43 annos, in su 1635. Su traballu suo at postu sas bases pro sa nàschida de s’informàtica moderna. S’automatizatzione de sos càrculos at abertu su caminu a inventziones prus cumplessas comente s’isvilupu de sos computadores eletrònicos in su XX sèculu. In eredidade nos at lassadu sa testimonia de comente sa curiosidade e sa punna de connòschere potzant èssere unu motore de cambiamentu pro s’istòria de s’umanidade.
Gianfranca Orunesu
Leave a comment