Gràtzias a su calendàriu chi agiudat, ocannu sas dies de Pasca s’intritzant cun su 25 de abrile e cun su primu de maju dende sa possibilidade a gente maicanta de si liberare dae su traballu e fàghere una pasada prus longa e biagiare. Pro custa resone sos agriturismos e sos albergos sardos ant inghitzadu s’istajone issoro un’agigu prima de su sòlitu, ca chi aberit como non tancat fintzas a atòngiu. Sos nùmeros sunt bonos cun passegeris chi sunt lompende a sos tres aeroportos prus mannos de s’ìsula e chi ant a èssere prus o mancu 200 mìgia.
Paolo Manca de Federalberghi contat de una noa: sunt torrende a èssere importantes sas agentzias turìsticas, chi sunt ammanigende biàgios a sos turistas in pachetos chi aunint mare e cultura. Non capitaiat dae su 2019, a dae in antis de su Covid. Sos albergos chi ant incumintzadu sas atividades issoro sunt su 35% de su totu e tenent giai aparaulados aposentos meda, prus de sos annos colados: difatis, narat Manca, pro como amus barigadu sos nùmeros de cada mese de su 2024, francu pro austu. E andant bene fintzas sas istruturas de acollida chi non sunt albergos. Finamentas sas osteras e sos agriturismos sunt andende bene meda e non petzi pro sa die de eris, lunis de Pasca, ma pro su fine de chida longu imbeniente. Una Pasca bona fintzas pro sa còmpora de durches de pastisseria, chi est creschende a cunfrontu de su barigadu.
Sos datos chi ponent pidinu sunt duos: sos prètzios semper prus artos e sa farta de traballadores in prus de unu setore. S’ischit chi s’inflatzione non est una situatzione noa, ma est beru chi sos istipèndios sunt semper firmos (fintzas cussos de sa ristoratzione e de sos albergos) e sunt un’istorbu mannu a sa crèschida prus mannas de sos setores mentovados.
Leave a comment