Su guvernu fiat timende su biàgiu de sa Presidente de su Cussìgiu in sos Istados Unidos. Su Presidente Trump at avesadu su mundu a paràulas pesosas e atacos a s’ispessada, naradas fintzas a sos alleados prus istrintos. Sa bìsita istitutzionale tando podiat èssere un’umìliu, ma gasi no est istadu.
Trump at ondradu Meloni cun cumplimentos mannos e inditende·la comente una ghia de giudu non petzi pro su Paisu, ma pro s’Europa e su mundu. Una polìtica chi at triuladu in mèngius s’Itàlia e chi est sighende su surcu de sa polìtica trumpiana. Dae s’ala sua, Meloni, non s’est aberta in àlabos de coro, est istada abista a non si pònnere tropu dae s’ala de sos USA, ma at proadu a carignare s’Ego de Trump cun promissas importantes. Su rolu suo fiat fintzas de amparare s’Europa e afortiare una lìnea modde e chi cheret faeddare cun sos istadunidensos: totu pro si conchistare una positzione influente in s’UE a costàgiu de Macron, chi est pro una lìnea prus tètera. Trump si nd’est sapidu de custa partzidura e, dende importu a sa Meloni, est pensende de dare unu pagu de echilìbriu a sa dibata in s’Unione Europea.
Lassende su soru, lompimus a su casu. Ca custu contu est su chi amus bistu, ma sas aconntèssidas chi ant a batire cunseguèntzias sunt àteras. Meloni at promìtidu sa còmpora de deghe milliardos de gasu issortu dae sos USA, una cantidade gasi manna chi s’Itàlia non tenent nemmancu sas infrastruturas pro lu torrare a s’istadu gassosu, sos rigassificadores. Logos, a s’ispissu, chi sos territòrios non cherent ca faghent luòngiu meda. In prus at promìtidu de comporare prus armas dae sos Istados Unidos, fintzas si una de sas indùstrias prus mannas de armas in Europa est italiana: Leonardo, chi difatis at inghitzadu prus de unu programmas de produida de aèreos e carros-armados in paris cun sa Germània e sa Frantza. Àteras cosas chi Meloni at postu in sa mesa pro asseliare su tirannu sunt sos impinnos de su guvernu pro non fàghere colare sas tassas europeas contra a sos gigantes de su web e pro lòmpere a su 2% de gastos pro sa defensa.
Gabriele Tanda
Leave a comment