A pustis de meses de trigadiu, e bator esertzìtzios provisòrios, sa finantziària est lòmpida a su Cussìgiu regionale, ma sa Presidente Todde, at pèdidu, mescamente a sas fortzas chi la sustenent de fàghere in presse e menguare a su mìnimu sos emendamentos, pro acurtziare su caminu e agabbare in custu mese, ca non si podet prus presentare àteros esertzìtzios provisòrios e tando su tempus est pagu.
In custas dies b’est sa dibata a subra de sos fundos pro s’universidade e sa chirca. Sa Giunta Todde est proende a fàghere colare unu cantidade de soddos prus manna de s’àteru annu, proende a sanare sa segada de sos fundos fatas dae su guvernu Meloni. In sa lege de bilàntziu italiana de ocannu, difatis, ant bogadu 247 milliones de èuros a totu su sistema de s’Universidade, sos annos imbenientes no at a èssere mègius ca sas mutzadas ant a sighire. Sa Giunta Todde, amparada dae Camilla Soru de su PD, at naradu chi custu est un’apretu mannu ca andat a corfare su chi faghet andare a dae in antis sas universidades e sa chirca, chi giai dae tempus est sufrende sa menguada de sos iscritos e de sos istudiantes.
Dae s’ala de sas opositziones, s’atacu no est bènnidu pro sa proposta etotu, ma pro sa cantidade e sa manera impitada. S’acusa est chi sa Presidente at dadu su cumandu de istare mudos a sos suos, pro fàghere in presse, ca custu modu de fàghere andat contra a sa dibata democràtica. In prus, segundu a sas opositziones, su dinari non bastat pro acontzare s’istampu chi est nàschidu ocannu, dae su guvernu de s’ala issoro.
Cuntierras chi b’istant in su giogu de sa polìtica: sa dereta cheret sa faddida de sa finantziària, o nessi un’istorbu chi fatas iscàndalu, prus de cussu chi b’est istadu pro su trigadiu. Sa manca, chi si nd’est sapida de sos problemas mannos chi at pesadu, depet proare a acontzare sos dannos.
Gabriele Tanda
Leave a comment