Su guvernu de su Niger at detzìdidu de adotare comente limba ufitziale s’hàusa. Finas a como sa limba de istadu fiat su frantzesu.
Custu sèberu est una de sas novidades presentes in sa Carta de Rifundatzione bogada su mese de martzu coladu, comente narat s’agentzia de novas russa Sputnik. Intre sas àteras cosas in sa Carta ddo’est iscritu chi Abdourahamane Tiani, autore de su corpu de istadu de su mese de trìulas de su 2023 chi nch’at bogadu a su presidente Mohamed Bazoum, est presidente de sa Repùblica, Capu de Istadu e de sas Fortzas Armadas. In prus sunt decrarados isortos totu sos partidos polìticos e sunt istabilidos chimbe annos de transitzione polìtica.
Pròpiu su mese de martzu coladu su Niger, paris cun su Mali, fiat essidu dae sa OIF (Organisation Internationale de la Francophonie).
A nàrrere sa beridade sa OIF aiat suspèndidu su Niger a pustis de su corpu de istadu e de sa suspensione de sa democratzia.
Custa detzisione de su guvernu de Niamey truncat sos ligàmenes, nessi culturales e linguìsticos, cun s’ex colonizadore.
In antis su paisu, semper paris cun su Mali e in prus cun su Burkina Faso, fiat essidu dae su ECOWAS, sa comunidade econòmica de sos istados de s’Àfrica otzidentale. Sos tres alleados ant creadu aterunu organismu, mutidu Alleàntzia de sos Istados de su Sahel.
Sunt totu signales de unu càmbiu importante a livellu geopolìticu in un’àrea chi est manifestende sentimentos antifrantzesos e est istabilende un’alleàntzia istratègica cun sa Rùssia.
S’hàusa, limba de su pòpulu omònimu, chi apartenet a su grupu de sas limbas tzàdicas, de sa famìllia de sas limbas afroasiàticas, est faeddadu massimamente intre Niger, in ue sa metade de sa populatzione ddu faeddat comente prima limba, e Nigèria, ma est impreadu comente lingua franca dae sa majoria de sos nigerinos e finas intre pòpulos a làcana.
(gianni muroni)
Leave a comment