Sa Frantza non tzedet in sa gherra contra a sos telefoneddos in iscola. Si giai dae su 2018 su paisu europeu fiat de sos primos chi previdiat s’istudada de sos tzellulares in intro de sas oras de letzione, como sas restritziones sunt finamentas prus mannas: pitzinnos e pitzocos intre sos 11 e sos 15 annos, cando comintzat sa diada de iscola, los ant a dèvere serrare in intro de armàrios o sachitos dèghidos pro los torrare a leare petzi cando sas letziones sunt finidas. Sa proibitzione est totale, comente annuntziadu dae sa ministra de s’Istrutzione pùblica Elisabeth Borne a pustis de àere isperimentadu sa medida sos meses colados. In cabudanni fiant 180 sos istitutos chi aiant proadu unu “pasu digitale” interessende 50mìgia dischentes. Sa ministra Borne at faeddadu de resurtados positivos e, movende dae custos cunsideros, at disinnadu de atzellerare sos tempos pro chi, a comintzu de s’annu iscolàsticu nou, su pasu colet dae s’isperimentatzione a s’òbligu. E sa cosa non pertocat sos telefoneddos ebbia ma fintzas sas taulitas e sos rellògios multimediales. A sa base de su progetu b’est s’idea chi de custa manera sos pitzocos potzant comunicare mègius tra issos e cun is maistros issoro. Si pensat chi custa mesura potzat finamentas dare agiudu mannu contra a su bullismu, mescamente in custos tempos in ue non b’at una làcana manna intre custu e sa versione sua cyber. Pro seguru fenòmenos de bullismu in intro de sas oras de letzione, in sos càmbios de ora e in sos momentos de recreu no los ant a pòdere filmare. Duncas su fenòmenu si diat pòdere manifestare a s’antiga, ma sena sos trastes pro los cumpartzire. Cosa chi diat pòdere funtzionare comente istorru sende chi bortas medas est sa punna social sa chi ativat custas atziones. Posca tocat a cumprèndere si sa mesura podet agiudare in su rendimentu, ma custa est un’àtera fatzenda.
mauro piredda
immàgine pexels