In sa prataforma de giogu in lìnia Steam non b’est prus. Nche l’ant bogadu in antis in Austràlia e Cànada e como finas in su Regnu unidu. Semus faeddende de “No Mercy”, videogiogu de casta visual novel (est a nàrrere istòria digitale interativa) essidu dae sas concas de Zerat games e cun in intro sas fainas de de unu mascru chi no atzetat unu “no” dae sas fèminas presentende·si comente su peus bisu malu issoro pro more de violèntzias fìsicas.
“No Mercy” est unu giogu prèmium chi chie si siat podiat comporare afirmende de àere lòmpidu sos 18 annos sena controllos pro averguare s’edade reale. In custas dies, in antis de s’eliminatzione sua dae Steam, fiat intervènnidu su ministru inglesu cun dèlega a sa tecnologia Peter Kyle, ma finamentas assòtzios contra a sa violèntzia de gènere. «Custa cosa – at naradu Marie-Claire Isaaman de sa no profit Women in Games – imbiat messàgios angustiosos: sa violèntzia contra a sas fèminas no est a la bajulare ebbia ma finas una cosa de si leare a giogu».
In su Regnu unidu non sunt noos a chistiones che a custas. Pagu prus de un’annu a como fiat essida sa nova chi a una pitzinna de 16 annos l’aiant molestada e violentada una truma de avatar maschiles in su metaversu. Gasi etotu, andende a dae in segus, connoschimus s’istòria de Nina Jane Patel: sa psicoterapèuta nòdida, chi conduet chircas in cussu ambiente, aiat contadu de àere sufridu violèntzia sessuale in su videogiogu Horizon Worlds de Meta. Sa realidade virtuale, est cosa chi ischimus, l’ant progetada pro èssere immersiva e pro ofèrrere un’esperièntzia sa prus serente possìbile a sa realidade. No giuat a sutavalutare sos efetos de sas acontèssidas in su metaversu, mescamente si sunt tràumas o eventos de violèntzia. E si faeddamus de minores, sa chistione est prus delicada ca sa psiche issoro est in fase de isvilupu e unu tràuma, mancari virtuale, podet cajonare dannos psicològicos cun reatziones in sas dinàmicas relatzionales e in sa pertzetzione de su mundu. Gasi, su dolore in su metaversu si fùrriat a dolore tangìbile e reale. Non bastat duncas sa batalla pro chi sa violèntzia de gènere si nch’isperdat in sa realidade fìsica; custas fainas (reparu e annestru de manìacos e de incel – bajanos chi narant de lu èssere pro voluntade no issoro) nos ponent un’artis-artis meda prus mannu.
Gianfranca Orunesu
Leave a comment