Su mundu ebràicu americanu, dae semper in favore de Israele e de sa polìtica sua, est cumintzende, in custos ùrtimos annos, a tènnere carchi dissidente.
A contare s’esperièntzia de giudeos de Istados Unidos, pro su prus giòvanos, chi ant cambiadu idea subra s’istadu de Israele, est su documentàriu Israelism, giradu in su 2023.
Sos registas sunt Erin Axelman e Sam Eilertsen.
Sa presèntzia de duas istitutziones che a s’Anti Difamation Legaue e s’AIPAC (American Israel Public Affairs Committee), chi tenent un’influèntzia manna a livellu polìticu e sotziale, faghet in modu chi sos giudeos americanos siant espostos dae sa nàschida a una visione unilaterale de su problema israelopalestinesu.
In prus de 500 colleges e universidades sunt presentes setziones de s’Hillel, organizatzione istudentesca ebràica fundada pròpiu in sos Istados Unidos, chi afòrtigat su ligàmene de sos istudiantes giudeos cun Israele.
Sa pellìcula nos mustrat s’àtera cara de sa medàllia. Giòvanos chi ant sessadu de cunsiderare sos palestinesos che inimigos, pròpiu a pustis de èssere istados in Terrasanta.
Calicunu de issos, a pustis de su servìtziu militare in sos territòrios ocupados, est intradu in s’assòtziu Breaking the silence, in ue veteranos de sas fortzas armadas israelianas denùntziant sas violèntzias cummìtidas dae s’esèrtzitu.
Calicunu àteru at cumintzadu a bìdere sas cosas dae s’ala de sos ocupados, cumprendende chi cudda terra non fiat bòida ma teniat giai una populatzione in antis de sa nàschida de Israele. Est su casu de Simone Zimmerman, chi in su 2014 at fundadu su grupu IfNotNow, chi cundennat s’ocupatzione de Gaza e Tzisgiordània.
Sa pellìcula dat boghe a una minoria, chi però est creschende, de giudeos americanos, chi chircant de s’opònnere a s’identificatzione intre Israele e comunidade ebràica de sos U.S.A. Pro cumprèndere s’importàntzia de su puntu de bista de sos giudeos istadounidenses in custa chistione bastat a ammentare chi de sos 450.000 colonos de sa Tzisgiordània 60.000 sunt pròpiu americanos.
(gianni muroni)
Leave a comment