Foto leada dae su situ ufitziale de su Ses Natziones
S’ala manca de sa Frantza, Louis Bielle-Biarrey, est istadu premiadu comente mègius giogadore de su torneu de sas Ses Natziones de rugby 2025, bintu pròpiu dae sos frantzesos.
A ddu seberare sunt istados sos tifosos chi ant partetzipadu a su cuncursu bandidu dae s’organizatzione de sa cumpetitzione.
Su trescuartos transalpinu est lòmpidu primu in una seletzione de bator giogadores. Sos àteros tres fiant Tommy Freeman, ala destra de s’Inghilterra, Blair Kinghorn, estremu de s’Iscòtzia, e Tommaso Menoncello, tzentru de s’Itàlia.
Bielle-Biarrey fiat giai istadu premiadu pro sa mègius meta de su torneu, marcada contra a s’Iscòtzia: in sa fasca manca de su campu su giogadore aiat mandadu a in antis sa botza de pee e dd’aiat recuperada in lestresa in s’àrea de meta.
Est istadu finas su mègius marcadore de custu Ses Natziones, cun oto metas totales.
Su prèmiu a su mègius giogadore de su torneu est istadu istituidu in su 2004. Su primu a ddu bìnchere fiat istadu su trescuartos tzentru irlandesu Gordon D’Arcy. S’ùrtimu, ocannu passadu, s’italianu Menoncello.
Sa natzione chi dd’at bintu de prus est s’Irlanda. Bielle-Biarrey est su segundu frantzesu a otènnere su reconnoschimentu. In antis suo at bintu su chi est como su capitanu de sos bleus, su medianu de mìschia Antoine Dupont, in su 2020, in su 2022 e in su 2023.
Bielle-Biarrey est nàschidu in su 2003 in La Tronche, in su dipartimentu de s’Isère. Sa mama est de s’Ìsula de sa Riunione, territòriu de ultramare frantzesu. A pustis de sas primas esperièntzias cun su Grenoble est passadu a s’Union Bordeaux Bègles.
Artu 1,84 pro 85 chilos de pesu, ddi mutint Bip Bip, unu pagu pro sas initziales de su sambenadu e massimamente pro sa lestresa chi sos tifosos frantzesos ddu ponent a pare cun su pugione famadu, su currecaminos, de su cartone animadu de Wil Coyote.
(gianni muroni)
Leave a comment