de Salvatore Serra
Meta at cumintzadu a pònnere finas in Europa s’assistente suo de IA in sas aplicatziones suas de retzas e messageria: WhatsApp, Instagram, Facebook e Messenger. MetaAI lompet como in Europa, però sa prima essida sua est istada in sos Istados Unidos in su 2023. Sos impitadores podent bìdere in sos ischermos su sèberu “chatare cun sa IA” in forma de unu chircu asulu minore. Pro como est disponìbile petzi in ses limbas de su continente: ispagnolu, inglesu, frantzesu, italianu, tedescu e portughesu.
Sa funtzione servit pro chatare cun s’assistente o pro pedire sa partetzipatzione sua in carchi chat de WhatsApp iscriende “@MetaAI”. In sas retzas sotziales permitit de afinare sa chirca de post o vìdeos curtzos subra de unos cantos temas o logos.
Sa funtzione permitit finas de generare immàgines e de las editare. Meta pretzisat chi podet lèghere petzi sos messàgios imbiados a sa IA sua, no a su restu: “Meta podet lèghere solu sos messàgios chi fentomant @MetaAI o sos chi sas pessones detzident de cumpartzire con Meta AI. Meta non podet lèghere perunu àteru messàgiu in sas chat personales suas”, narat s’ impresa.
Leave a comment