Gherra e resilièntzia Ue. Pro 72 oras a pustis de unu disacatu semus a postu

Cun sa punna de «antitzipare, prevènnere e rispòndere a minetzas e crisi noas», sa Cummissione europea at elaboradu unu pianu cun bator arriscos crae: disastros naturales (aundamentos, fogos, terremotos e eventos meteorològicos estremos cajonados dae su cambiamentu climàticu); disastros cajonados dae s’òmine (intzidentes industriales, guastos tecnològicos e pandemias); minetzas ìbridas (assàchios informàticos, campagnas de disinformatzione, manipulatzione e interferèntzia de s’informatzione istràngia, sabotàgiu de infrastruturas crìticas); crisi geopolìticas (cunflitos armados, agressiones armadas contra a Istados membros). Pro parare fronte a custos arriscos, su pianu movet dae un’assentu integradu e globale de guvernu e orientadu a sa sotziedade. Racumandadu a sos tzitadinos de b’àere in domo una riserva de màndigu e de abba, de baterias e de dinare, pro chi siant autònomos nessi pro 72 oras, pro chi potzant subravìvere sas oras in fatu a un’eventu crìticu. Inditos finamentas pro sos guvernos pro sos assàchios hacker. «S’istrategia punnat a megiorare sa preparatzione e sa prontesa tzivile e militare de s’Ue pro sas crisi de su benidore a tales chi totu sos atores siant prontos e a tretu de rispòndere a lestru e cun profetu in casu de netzessidade. S’istrategia at a agiudare sos isfortzos natzionales e de preparatzione megiorende su coordinamentu e s’efitzèntzia de sas istrategias esistentes e promovende una cultura de sa resilièntzia pro mèdiu de s’impignu de totu sos livellos de sa sotziedade». Sa nova est essida oe ma noa noa no est, sende chi ghias de subravivèntzia las ant giai distribuidas in Norvègia, Isvètzia e Finlàndia. Finas in Frantza nde sunt preparende una. Abarrat de cumprèndere comente bìvere coladas sas 72 oras. O mègius, de cumprèndere comente evitare chi lompat s’ora de sa gherra,finas investende su dinari in sa giustìtzia sotziale e in sa preventzione ambientale.