In antis s’iPhone 16e, pustis su Pixel 9a e in fines totu sos àteros: sa cabìa de sas baterias de sos telefoneddos est creschende, e custu no est de badas. Sa chistione est chi s’Intelligèntzia Artifitziale consumat tropu. Duncas Google ite at fatu? At cambiadu su disinnu de su Pixel 9a abbandonende sa barra icònica orizontale. No l’at fatu pro resones de estètica, ma pro unu sèberu progetuale, est a nàrrere pro nche pònnere una bateria de 5100 mAh in unu telèfonu de 6.3”. Aumentat sa grussària de sa carena, si mìnimat sa distàntzia intre su bidru e sa telecàmera e a cussu puntu est inùtile a agiùnghere unu gradinu chi diat èssere tropu finu, si preferit a mantènnere unu disinnu belle “a filu”.
Non b’est istada Google ebbia a aumentare sa cabìa de sas baterias: Apple, cun iPhone 16e, at petzi decraradu chi b’at un’autonomia prus manna e at bantadu sa funtzionalidade energètica de su modem C1 sena intrare però in sos particulares de sa bateria a su lìtiu chi diat èssere de su 25% prus de cabìa de sa chi si impitat, pro nàrrere, in iPhone 13. In àteras allegas, andat bene sa funtzionalidade de su modem, ma s’autonomia prus manna b’est pro more de sa bateria prus manna.
In s’ùrtimu annu finas in sos modellos 6,7 de gamma arta, a su sòlitu firmos a una tzella de 5000 mAh, b’at àpidu una crèschida manna, mescamente pro more de s’impreu de baterias a intensidade arta dae bandas de produtores tzinesos medas. B’at chie proponet 5600 mAh, chie 6000 mAh e chi est resessidu finas a andare prus in gasi, cun 6.200 mAh.
Pro ite lu faghent? Non pro assegurare prus autonomia a sos impitadores, ma ca sos telèfonos in sos meses venidores e in sos annos venidores ant a consumare semper de prus, e sa responsàbile prus manna de custu at a èssere s’IA.
