Foto leada dae su situ ufitziale de sa English Football League
Domìniga 16 de martzu, in Wembley, su Newcastle United at bintu, 2-1 contra a su Liverpool, sa Copa de Lega, manifestatzione istituida in su 1955 e riservada a sas iscuadras professionìsticas, a diferèntzia de sa Copa de Inghilterra, aberta a totu sas categorias.
Est su primu tìtulu, sena de cunsiderare s’Intertoto, manifestatzione minore, pro s’iscuadra bianca a niedda a pustis de sas Copa de sas Fieras de su 1969. S’ùrtima vitòria in pàtria fiat addiritura de su 1955, cun sa Copa de Inghilterra.
S’iscuadra de su nord-est de s’Inghilterra torra duncas a èssere protagonista pro more de sa propiedade àraba, chi at rilevadu su club in su 2021.
Su fundu de investimentu soberanu de s’Aràbia Saudita PIF (Public Investment Fund) est traballende in manera diferente, nessi pro como, dae su Qatar, chi cun Manchester City e Paris Saint Germain at postu finas dae printzìpiu unu muntone de dinari pro s’assegurare sos mègius giogadores internatzionales.
Sos sauditas ant fatu una pariga de investimentos importantes, massimamente in mediana cun su brasilianu Bruno Guimarães e s’italianu Tonali, e cun tzentratacu Isak, isvedesu de ratza eritrea, ma su Newcastle si caraterizat pro una presèntzia manna de giogadores inglesos, ses titulares in sa finale de domìniga, e paritzos giòvanos, cumintzende dae s’ala Gordon, chi fiat assente pro iscualìfica.
Inglesu est finas su tècnicu, Eddie Howe, chertu pròpiu dae sos sauditas. S’investimentu in su fùbalu, fatu, est craru, pro resones geopolìticas, est duncas prus moderadu in sos modos in cunfrontu de àteras realidades sìmiles.
In ogna modu in Wembley sos tifosos in biancu e nieddu ant afestadu a pustis de una prestatzione positiva in ue su Liverpool no at mai postu in dificultade s’iscuadra issoro. Sa prima rete est bènnida, de conca, dae su difensore Burn, nàschidu a 18 chilòmetros dae Newcastle. In su segundu tempus Isak at marcadu su segundu gol. Inùtile in su recùperu sa marcadura de Chiesa, intradu in sos ùrtimos minutos. Howe est su primu tècnicu inglesu a bìnchere unu tìtulu natzionale a pustis de Harry Redknapp, chi in su 2008 aiat conchistadu sa Copa de Inghilterra cun su Bournemouth.
(gianni muroni)
Leave a comment