Foto leada dae su situ ufitziale de su Ses Natziones
Sa Frantza at bintu s’editzione 2025 de su Torneu de sa Ses Natziones de rugby. Matessi nùmeru de vitòrias de Inghilterra e Irlanda ma mègius diferèntzia puntos, cun in prus su puntu bonus ofensivu pròpiu in s’ùrtima partida de sa cumpetitzione, contra a s’Iscòtzia, giogada sàbadu 15 a sas noe de sero in Parigi.
S’iscuadra de Galthier at sufertu unu pagu in su primu tempus, finidu cun una meta peròmine, de su tzentru Moefana e de s’ala iscotzesa Graham, neghe de duas ammonitziones a Mauvaka e a Gros. At mustradu però sa superioridade sua marchende tres metas in sa segunda parte cun Bielle-Biarrey, cun un’atzione partida dae una faddina de s’abertura iscotzesa Russell, cun Ramos e cun Moefana.
Sa prima partida de s’ùrtima die, in Roma, at bidu s’Itàlia resistende finas a sa fine a s’Irlanda chi però nch’est resurtada a otènnere sa vitòria. Sa prima meta dd’at marcada sa formatzione de domo cun s’australianu ecuiparadu Ioane. Sos irlandesos ant marcadu in su primu tempus cun s’estremu Keenan e cun su tallonadore Sheehan.
In su segundu tempus torra meta italiana cun su medianu de mìschia Page-Relo e sa risposta tzèltica cun Sheehan chi a coa at torradu a marcare pro sa de tres bortas. Una bella atzione de Capuozzo, cun passàgiu de pee in profundidade, at permìtidu a Varney, subintradu a Page-Relo, de realizare s’ùrtima meta italiana.
Sa prestatzione de sos meres de domo est istada cunditzionada dae duas ammonitziones, sa prima a Lamaro, chi fiat subintradu a Negri, in su primu tempus, sa segunda a prima lìnia Nicotera a fine partida, e dae s’espulsione de Vintcent in su segundu tempus.
In Cardiff su Galles at colletzionadu sa de deghessete derrotas a fila a pare, impeorende duncas su record negativu istòricu. S’Inghilterra at marcadu 10 metas, cumintzende a su 3° cun su capitanu Itoje e sighende a su 10° cun s’ala Roebuck. Sa meta de su trescuartos de sos dragones Thomas, chi a coa at marcadu in su segundu tempus puru, at dadu s’illusione a su pùblicu de domo de pòdere echilibrare sa partida ma a pustis de pagos minutos est arribada sa meta de su tzentru Freeman e a coa est sighida s’alluvione de marcaduras inglesas, duas de custas pro more de sa tertza lìnia Pollock, a su debutu, intradu dae sa panchina.
Resurtados: Itàlia-Irlanda 17-22, Galles-Inghilterra 14-68, Frantza-Iscòtzia 35-16. Classìfica: Frantza 21, Inghilterra 20, Irlanda 19, Iscòtzia 11, Itàlia 5, Galles 3.
(gianni muroni)
Leave a comment