Giòbia mangianu in s’istrada a curtzu a Torpè, bator òmines in duas veturas ant firmadu unu furgone de sa Mondialpol chi aiat a intro noranta mìgia èuros e l’ant isrobadu. S’iscena contada dae sa bàrdia est prus minore de sas de sos meses colados, ma sa seguresa in sas movitias de sos furones paret sa matessi. A pustis de un’iscansada su porta-volores benit barigadu dae duas màchinas chi li serrant sa carrera. Falant duos òmines e incumintzant a isparare a su motore e su bidru in ue a dae segus istat sa bàrdia. Pro fortuna est antiproiètiles e s’autista podet pònnere sa retromarcia e proare a fuire. Su motore però tenet dannos mannos e perdet benzina, e gasi si firmat a pustis de 400 metros.
Su furgone est intundadu dae sos furadores cun sas armas miriadas a sa bàrdia, chi tenet sa timoria de unu fogu: non podet fàghere àteru chi abèrrere su portabagàglios e lassare a sos criminales sa balìgia cun su dinari. Cando si nche sunt andados, su vigilante mutit sa politzia. Chi si ponet dereta in chirca de sos isrobadores.
Torra corfada sa Mondialpol a pustis de s’atacu de làmpadas 2024 e de su 2016. Torra un’isrobatòriu in carrera a pustis de sos duos in sa 131 de su 2024 e 2022 in sos tretos de su Meilogu. Pròpiu in su Logudoro dae s’istiu, a s’agabbu de onni mese, si bidet mèdios maicantos de sas fortzas de s’òrdine compidende sas istradas, cun fintzas un’elicòteru controllende dae artu. Sa risposta, tando, b’est istada, ma cun una làcana in su tempus e in su logu. Ca non si podet allarghiare tropu.
Su problema est istruturale, comente narat su sindacadu de sa politzia “Equilibrio e sicurezza”: mancat personale, fintzas pro ammanigiare bene su CPR de Macumèr; e non si podet isperare chi sa seguresa potzat istare in operatziones “ad alto impatto”.
Gabriele Tanda
Leave a comment