In Frantza b’ant fatu unu film chi (“La Boum” su tìtulu originale suo) in Itàlia l’ant presentadu comente “Il tempo delle mele”, su tempus de sa mela. Ma in Frantza, como, b’at una mela chi est colende iscutas in pensamentu. Ca Apple est acusada de pràticas cummertziales ingannadoras e de violatzione de sa privadesa de sos utentes pro mèdiu de sa regorta illegale de datos personales. Comente lu diat dèvere àere fatu? Cun s’assistente vocale suo Siri.
Est pro custu chi s’organizatzione non guvernativa Ligue des droits (sa lega de sos diritos) at fatu càusa a s’azienda de Cupertino. Sa nova l’ant bogada a campu unos cantos mèdios de informatzione de su paisu transalpinu, comintzende dae Radio France e Le Monde. Totu naschet dae sa testimonia de unu dipendente chi at intregadu cumproas de sas regortas (a muntones) de sas registratziones vocales pigadas sena chi b’aeret àpidu cunsensu de sos autores.
Ma in antis de sa testimonia, ite b’at àpidu? Fiat su 2019, cando su teste traballaiat in s’azienda irlandesa Global Technical Services chi perfetzionaiat sas capatzidades plurilìngue de Siri, su còmpitu pertocaiat custas fases: iscurtu, trascritzione e categorizatzione de sas registratziones ativadas dae s’assistente de Apple. «Dae sa prima die – at naradu s’ex dipendente – nos ant comunicadu chi aìamus dèvidu traballare cun registratziones de gente chi faeddaiat cun Siri. O cun àteras pigadas sena chi issos l’aerent ischidu, cando su dispositivu s’atzendiat pro isbàlliu». Apple, chi su mese coladu at dèvidu isbursare belle 88 milliones de èuros pro una chistione simigiante in Usa, in Califòrnia, est narende chi non tenet neghe refudende sas acusas. Nant chi non nde costoint de registratziones (chi b’at àpidu mudadas dae su 2029 pro garantire cunformidade a sos istandard in contu de privadesa aziendale), e chi mai nd’ant impreadu cun punnas publitzitàrias e de marketing.
Gianfranca Orunesu
Leave a comment