At inghitzadu su caminu suo sa finantziària de sa Giunta Todde, a pustis de tres mese de trigadiu. S’at a leare belle totu su mese chi benit, custringhende sa Presidente a pedire torra s’esertzìtziu provisòriu pro sa presentada a su Cussìgiu.
Giuseppe Meloni, chi est su responsàbile Bilàntziu e vice-Presidente de sa Regione Autònoma de Sardigna, l’at decraradu, contende in generale ite at a fàghere sa medida. Su dinari a disponimentu sunt 9,9 milliardos, cun su 86% chi benit dae sas intradas de sas tassas sardas. Su prus sunt soddos chi ant giai un’indiritzu: sa sanidade s’at a leare su 40% pro chentu, a pustis bi sunt sos gastos obligados comente sos istipèndios de su sistema regionale. A sa fine su chi si podet ammanigiare est petzi 300 milliones: pagos in cunfrontu de su totu, ma medas pro sas netzessidades sardas. Meloni at acraridu fintzas sas punnas chi ant ghiadu sos sèberos: non est una finantziària tècnica, ma polìtica e progressista, ca ponet prus aficu a sos chi sunt in dificultade, a sas iscolas e a sas universidades; dat sustènniu a sas polìticas pro su traballu, ma sena corfare sas aziendas. Su problema est sos tempos longos. Setores maicantos sunt firmos e su caminu no at a èssere curtzu, e difatis Meloni pedit a sas fortzas de su Cussìgiu de fàghere a sa lestra.
S’opositzione dae s’ala sua, narat chi est una finantziària belle nudda coragiuda, ma chi lis paret una pro ammanigiare su fitianu e chi non torrat isceda a sas netzessidades de sos Entes Locales, mescamente sos comunes.
Est tzertu chi sa noa est bona, fintzas si benit a tardu, ma chi galu est tropu chitzo pro cumprèndere de a beru ite nd’at a èssere de totu sos annùntzios de como.
Gabriele Tanda
Leave a comment