Novas bonas dae s’Universidade de Tàtari: in su polu bionaturalìsticu tataresu de carrera de Piandanna ant inauguradu su Tzentru de simulatzione mèiga. Inoghe, comente at naradu su retore Gavino Mariotti, «sos istudiantes ant a pòdere fàghere esperièntzia direta perfetzionende sas cumpetèntzias issoro e isorvende cuadros clìnicos cumplessos pro mèdiu de simulatziones virtuales e iscenàrios interativos. S’esperièntzia achirida lis at a permìtere de gestire mègius sas emergèntzias, de pigare disinnos lestros e de traballare in iscuadra». In intro b’at sistemas de diagnòstica prus chi non sofisticados e manichinos de ùrtima generatzione chi riproduint cun perfetzione sas reatziones a sas patologias dae parte tipologias diferentes de patzientes: criaduras, pitzinnos, mannos, betzos, fèminas prìngias.
Sos simuladores avantzados permitint de fàghere pràtica in sa gestione de sas emergèntzias, de s’anestesia e de sa terapia intensiva cun manovras chi devent rispòndere a su deperimentu clìnicu pro mèdiu de interventos farmacològicos e protzeduras de sucursu avantzadas comente sa ventilatzione assistida. De prus, est possìbile s’annestru in chirurgia cun su simuladore laparoscòpicu pro sas protzeduras cardiològicas, neurològicas e vasculares minivasivas. Ma fintzas àteru b’at, comente sas tecnologias avanguardìsticas pro s’ecografia e s’imaging mèigu pro visualizare e analizare sos òrganos internos (coro, purmones e àteru) cun immàgines detalliadas.
Gasi etotu est presente unu sistema avantzadu pro esplorare s’anatomia pro mèdiu de modellos 3d cun risolutzione arta, de agiudu mannu pro sa formatzione in meighina legale, ortopedia e chirurgia. Su laboratòriu est de 450 metros cuadros, partzidu in ambientes diferentes cun visores mannos de 85 pòddighes. A regime diat pòdere ospitare s’esertzitatzione de 50 istudiantes in sas postatziones presentes.
Gianfranca Orunesu
(Foto dae Kaboompics.com)
Leave a comment