Dae su 2018, in sas partidas de fùbalu in televisione e in sos istàdios, non si podiat fàghere prus publitzidade a su giogu de azardu, e a sos giassos in retza chi acolliant, a manera dereta, sas iscummissas. E sa manera faghiat sa difèntzia manna, ca si est beru chi non si podiat fàghere publitzidade a cussa genia de produtos, est beru fintzas chi sas sotziedades de su setore, aiant ammanigiadu in presse un’imbòligu: televisiones e giassos de informatziones chi daiant noas a subra de su fùbalu e chi, a su matessi tempus, daiant sas cuotas de cada resurtu de sas partidas trasmìtidas in cussas oras e cussigende ligàmenes a sos logos in ue si podiat iscommìtere. Fintzas sas publitzidades si nche sunt tramudadas sa beste: a s’imbesse de dare s’impèllida a sas iscummissas, faeddaiant de fùbalu, dende a s’agabbu sas cuotas.
Su guvernu Conte aiat seberadu sa medida pro pònnere una làcana a sa ludopatia, mescamente ca sos spot de custa casta, colaiant in mesu a programmas sighidos meda fintzas dae sos minore e sos giòvanos. Como su guvernu Meloni est in chirca, in sa commissione Cultura de su Senadu, de cantzellare sa proibida. Sa resone segundu a Paolo Marcheschi, chi est su chi l’at propostu, est ca no est funtzionende de a beru. Imbetzes de megiorare sa proibida, e sigomente sos balàngios a sas iscuadras de fùbalu sunt menguende e sunt in crisi dae tempus meda, si cheret torrare a las fàghere balangiare dae cussa genia de publitzidades. S’idea est de pònnere su dinari chi at a intrare pro annoare sos istàdios e sustènnere sos setores giòvanos e femininos de sas iscuadras.
Su problema mannu de sa ludopatia est chi corfat mescamente sos chi dinari non nd’ant meda e faghet dannos mannos a sa sotziedades e a sas famìllias, e batit soddos maicantos a sotziedades ricas e a s’ispissu nemmancu italianas. In Sardigna su problema est sèriu de a beru, cun nùmeros de assuconare.
Gabriele Tanda
Leave a comment