Àteros 40 milliones de èuros postos a cùrrere pro mantènnere biu su Servìtziu pùblicu de identidade digitale, chi totu cantos connoschimus cun sa sigla sua Spid. Sa nova est sa de su Dipartimentu pro sa trasformatzione digitale, chi at comunicadu s’istantziamentu netzessàriu pro sos gastos sustènnidos dae sos provider pro frunire a sos tzitadinos s’ID issoro. Ma si cumprendet chi custu diat pòdere èssere s’ùrtimu contributu istatale, sende chi punna de su guvernu est sa de cumbìnchere s’impreu massissu de sa carta de identidade eletrònica e de It Wallet. Custu est su sistema chi diat dèvere ratzionalizare e megiorare s’identidade digitale e s’atzessu a sos documentos pro mèdiu de smartphone.
Torrende a su Spid, de custa pròroga si nde faeddat dae su mese de austu de su 2023. A su presente non b’at iscadèntzia inditada, ma nessi ant firmadu unu decretu chi paritzos utentes (tzitadinos e impresas) fiant isetende dae tando. Como chi est como, sos gestores de s’identidade digitale sunt 12, cun Aruba chi, dae pagu, est a pagamentu francu su primu annu. Su traballu issoro est mannu: cunforma a s’ùrtimu agiornamentu (publicadu su 3 de custu mese) nche lompent a 40 milliones sas ID frunidas.
«Amus iscurtadu e retzidu – at naradu Alessio Butti, sutasegretàriu de sa presidèntzia de su Cussìgiu cun dèlega a s’innovatzione – sas istàntzias de sos gestores Spid. Cun custu decretu reconnoschimus su valore de s’isfortzu fatu dae sos privados pro isvilupare e gestire un’infrastrutura essentziale pro milliones de tzitadinos. S’obietivu nostru est su de afortire su sistema punnende a s’efitzèntzia e a s’interoperabilidade, garantende continuidade e sustenibilidade a sos operadores de su setore». A como b’at 50 milliones de Cie emìtidas; sa prima versione de It Wallet in app IO la sunt impreende belle 4,5 milliones de tzitadinos. Su 2026 at a lòmpere su portafòlliu digitale europeu (It Wallet est s’implementatzione italiana). Est tando chi diamus pòdere dare s’adiu a su Spid.
Gianfranca Orunesu
Leave a comment