Sa detzisione de s’amministratzione americana de retirare s’agiudu a s’Ucràina in sa gherra cun sa Rùssia at iscadenadu sas reatziones ferenadas de su prus de sos esponentes polìticos de punta europeos, chi non parent cuntentos de sa fine, inevitàbile, de sa gherra.
Sa presidente de sa Cummissione Europea Ursula Von der Leyen at annuntziadu ca s’Unione at a pònnere 800 milliardos de èuros in su progetu ReArm Europe.
Su candidadu a sa cantzelleria tedesca, Merz, cheret propònnere un’ispesa de tres milliardos pro su riarmu de sa Germània.
Sos àteros duos polìticos mannos chi non cherent atzetare sa fine de sas ostilidades intre Rùssia e Ucràina, duos istados chi non sunt ne in s’Unione Europea ne in sa NATO, sunt su presidente frantzesu Macron e su primu ministru britànnicu Kier Starmer.
S’obietivu est sighire a mandare armamentos a sos ucràinos pro chi sigant a gherrare.
A difèndere custa positzione ddo’at una parte non indiferente de su mundu intelletuale europeu, italianu incruidu.
Giai in su 1914/5 s’Euopa est istada vìtima de un’innamoramentu pro sa gherra, dae parte de polìticos e intelletuales.
Cheret naradu però chi nessi sos chi non bidiant s’ora chi s’Itàlia esseret partetzipadu a sa chi Papa Beneitu XV aiat mutidu L’inutile strage, in coerèntzia cun sas ideas issoro in trintzea ddoe sunt andados de a beru, sena distintziones de apartenèntzia polìtica: D’Annunzio, Mussolini o sos sardos Lussu e Deffenu, chi in gherra ddo’est mortu.
Non paret pròpiu chi sos chi oe cherent sighire una gherra chi at degumadu su pòpulu ucràinu, sena de contare sas vìtimas russas, chèrgiant pònnere in fatu a sos interventistas de issara.
Non passant mai de moda duncas sos versos de su poete romagnolu Olindo Guerrini chi in sa poesia Agli Eroissimi, a sa fine de s’Otighentos, de gasi iscriiat:
…Ah, siete voi? Salute o ben pensanti,
In cui l’onor s’imbotta e si travasa;
Ma dite un po’, perché gridate «avanti!»
E poi restate a casa?
Perché, lungi dai colpi e dai conflitti,
Comodamente d’ingrassar soffrite,
Baritonando ai poveri coscritti
«Armiamoci e partite?»…
(gianni muroni)
Leave a comment