Sa poesia nòdida de Alessandro Manzoni, “Il cinque di maggio”, gasi comintzat: «Ei fu…». Napoleone custu giru non b’intrat, ma su mentovu bi deghet su matessi ca in cussa die marcamus un’àtera dispedida: sa de Skype. E bi deghet finamentas ca sos annos de vida polìtica de Bonaparte, dae cando l’ant fatu primu cònsole a cando si nch’est mortu, fiant 22. Tantos cantos sunt sos chi at fatu custa prataforma de cramadas VoIP, est a nàrrere pro mèdiu de su protocollu internet.
Microsoft at duncas detzisu de nche pònnere in archìviu custa esperièntzia pro si dedicare ànima e coro petzi a Teams chi, che a Skype, oferit messagìstica, cramadas e cumpartzimenta de files. Ma chi cunforma a Skype est totu un’àtera cosa sende chi in prus b’agatamus istrumentos avantzados pro sos traballos de grupu e sa gestione de custos.
Skype naschet su 2003 e petzi dae su 2011 nch’est in intro de sas ainas targadas Microsoft. A deghe annos de atividade, s’istrumentu nche lompet a belle 300 milliones de utentes ativos. Ma in su mentres sunt lòmpidas prataformas noas comente Whatsapp e Telegram a un’ala, cun una messagìstica prus lestra, e Zoom a s’àtera cun sa popularidade sua in sas video-cunferèntzias de s’època Covid. A custu b’agiunghimus Teams, cun sa prima versione sua su 2016 e cun 20 milliones de utèntzias giai su 2019.
Dae su 2021, Microsoft at comintzadu a minimare su suportu suo pro Skype. Cun Windows 11, pro nàrrere, s’azienda at seberadu Teams comente aplicatzione predefinida pro sas comunicatziones ponende·nche Skype in unu cugioneddu. Cosa chi fintzas custa at determinadu una mèngua de impitadores, falados a 36 milliones su 2023. Peristantu Teams nch’at coladu sos 300 milliones.
De onni manera, custa est una transitzione chi no est repentina. Giai su 2017 Microsoft aiat detzisu de nde la finire cun sa versione aziendale Skype for Business. De prus, dae su mese de nadale de s’annu coladu non si podet prus comporare crèditu Skype. Como tocat a migrare a Teams cun sas credentziales Skype. Chie non cheret colare a Teams, in antis chi Skype lu serrent de su totu, si podet iscarrigare sa cronologia de sas chat.
Gianfranca Orunesu
(Foto de BM-Amaro)
Leave a comment