A pustis de prus o mancu de dòighi annos pro àere sos permissos, torrat a abèrrere sa mina de Silius. Chie b’est renèssidu est su geòlogu brescianu Umberto Gioia chi cun sa sotziedade sua, sa Sma Srl, in paris cun sa Edilmac srl semper de Brèscia e cun sos agiudos finantziàrios de Aruba, una sotziedade manna de servìtzios in sa retza, at mòidu una chimbantina de milliones pro inghitzare a isfrutare sa mata de sos montes de su Gerrei.
Sa punna est de produire, giai dae s’agabbu de ocannu, nessi 70.000 tonnelladas de fluorite e 6.800 de galena a s’annu, dende traballu a una chentinas de persones.
Su progetu est coladu pro more de su decretu Materie Prime Critiche nùmeru 84, aprovadu su mese de trìulas de su 2024. Sa lege est istada istèrrida pro s’impèllida de s’Europa, chi est proende a fàghere agatare a sos Paisos de s’Unione sos materiales de importu pro sa tramuda elètrica e de non los comporare dae fora, ismanniende sa dipendèntzia nostra. Difatis, de sos noranta milliones de tonnelladas de terras crìticas chi su mundu tenet (comente narat su United States Geological Survey), 44 sunt in Tzina, 21 in Brasile e 7 in Ìndia. S’isetu de sa UE est cussu de nde imbènnere calicunu de prus però inoghe.
Sa lege, in prus, acùrtziat su caminu pro s’autorizatzione a degheoto meses ebbia e at giai ammanigiadu un’istùdiu de s’ISPRA (incarca inoghe pro lèghere sos resurtos) pro inditare in ue si potzant abèrrere àteras minas. No ispantat chi giassos medas de interessu sunt in Sardigna, mescamente in su Campidanu de mesu.
Torrende a Silius, sas sotziedades chi ant a gestire sa mina ant asseguradu chi sa seguresa de s’ambiente at a èssere garantida e chi sa populatzione est de acordu a s’impresa noa. Est beru però chi sa Presidente Todde, in austu de s’annu coladu, si nche fiat chesciada contra a su guvernu ca totu sos sèberos no aiant leadu in cunsideru perunu sa Regione, a sa cale pertocant sas fainas de custa genia.
Non sunt craros, a s’imbesse, cale at a èssere su balàngiu de su territòriu e de sa Sardigna.
Gabriele Tanda
Leave a comment