Foto leada dae su situ ufitziale de su Ses Natziones
Peruna sorpresa in su de tres turnos de su Torneu de sa Ses Natziones. Su sàbadu, 22 de freàrgiu, s’Irlanda , favorida pro sa vitòria finale, est resurtada a bìnchere contra a unu Galles torradu a biu. Sas dimissiones fortzadas de su tècnicu Gatland carchi die a pustis de sa derrota cun s’Itàlia ant batidu in sa panchina de sos dragones a Matt Sherratt, head coach inglesu de su Cardiff. Intre sas novidades Anscombe, torradu a s’abertura a pustis de sas ùrtimas esclusiones, e s’esòrdiu de s’ala Mee.
A pustis de sa meta de su tertza lìnia irlandesa Conan su Galles at marcadu in antis cun Morgan, su capitanu, e a coa cun s’ala Rogers.
No est però bastadu a firmare su recùperu irlandesu, cun su medianu de mìschia Gibson-Park, su mègius in campu. In ogna modu s’iscuadra gallesa, mancari apat illonghiadu sa sèrie negativa, cun 15 derrotas a fila a pare, at mustradu megioros, finas cun sa bella prova de s’estremu Murray, issu puru, che a Anscombe, oriundu nàschidu in Nova Zelanda.
In Twickenham, in sa segunda partida, s’est bidu s’atopu prus echilibradu. A pustis de bator annos sa Calcutta Cup, su trofeu in pàliu intre Inghilterra e Iscòtzia, sas prus natzionales antigas de su mundu, est torradu a su bìndighi de sa Rosa. Iscotzesos in bantàgiu cun meta de White e inglesos chi fùrriant sa partida a su 70° cun una punitzione de Fin Smith, cunfirmadu a s’abertura. A unu minutu dae sa fine però sa meta de s’ala van der Merwe oferit a sos iscotzesos sa possibilidade de bìnchere ma sa trasformatzione de Russell andat foras de sos palos.
In sa partida de domìniga sero in Roma s’Itàlia at illùdidu sos tifosos suos cun sa meta initziale de su tzentru Menoncello ma a bellu a bellu sa Frantza at leadu su controllu de sa partida chi giai a sa fine de su primu tempus pariat detzìdida. Pro sos transalpinos, ùnicos in custu turnu a leare su puntu de bonus ofensivu, ùndighi metas, duas de su capitanu e medianu de mìschia Dupont, galu una borta su mègius giogadore in campu.
Resurtados finales: Galles-Irlanda 18-27, Inghilterra-Iscòtzia 16-15, Itàlia-Frantza 24-73.
(gianni muroni)
Leave a comment