Su votu tedescu at punidu sos partidos chi finas a eris fiant guvernende sa chi amus connotu comente sa locomotiva de s’economia europea. Is sotzialdemocràticos de Olaf Scholz sunt abarrados a manos iscutas falende·nche dae su 25,7 a unu 16,5% partziale. Non si la passant mègius is Birdes de Robert Habeck cun su 12,1%, mancari sa pèrdida issoro siat prus pagu grae (nche lompeint a su 14,8% su 2021). Derrota totale pro is liberaldemocràticos de s’Fpd chi, dae s’11 barigadu sa borta colada, como nemmancu lompent a s’isbarramentu abarrende·nche in foras de su Bundestag.
Cunforma a sas previsiones binchent duncas is cunservadores de sa Cdu colende·nche dae su 24,1 a su 28,6%. Su leader issoro Friedrich Merzest est cun probabilidade manna su cantzelleri nou. Ma cun chie at a guvernare? A su presente si narat chi nono a s’alleàntzia cun sa dereta estrema de AfD, su partidu de Alice Weidel chi at raddopiadu sos cunsensos. Custos diant èssere finamentas prontos a intrare in unu guvernu de tzentru-dereta, narende chi petzi una cumpositzione che a custa rispetat s’orientamentu populare de sos tedescos chi sunt andados a votare (prus de s’80%).
A manca creschet Die Linke de Ines Schwerdtner e Jan van Aken. Sa borta colada fiant a su 4,89%. Custu giru, mancari s’iscissione de dereta de sa ruju-bruna Sarah Wagenknecht (chi est a inghìriu de su 5% isperende de pònnere rapresentantes), su partidu eco-sotzialista pigat unu 8.7% chi rapresentat unu datu de resistèntzia in custa furriada generale a dereta e de derrota de sa sotzialdemocratzia. Su datu malu de Wagenknecht, pro parte sua, ammustrat chi is eletores, postos a seberare, ponent sa rughe subra de s’originale. E pro custu, si damus un’ograda a sa cartina, sos chirros de s’ex Ddr los ant conchistados sos natzionalistas de dereta.
E como su guvernu. Ma cale?
mauro piredda
(immàgine pexels @ingo)