Su 21 de freàrgiu ruet sa Die internatzionale de sa limba materna. Ocannu semus a sa de 25 editzione, sende chi sas Natziones unidas l’ant decrarada su 1999 comintzende a la tzelebrare dae s’annu a pustis.
E in custa ocasione, comente est acontèssidu pro S’Alighera pagas dies a como, fintzas àteros entes locales si sunt indiritzados a sa iscolas reconnoschende·las comente su logu su prus dèghidu pro s’amparu e s’ispàinu de sas limbas de Sardigna. Ca si in S’Alighera l’ant fatu pro su catalanu issoro, in Thiniscole, dae s’Unione de sos Comunes de su Monte Arvu, l’ant fatu pro su sardu
«Nois sardas e sardos – at naradu su presidente Salvatore Ruju – diamus dèvere comintzare a fàghere de custa die un’ocasione pro fàghere crèschere sa cussèntzia linguìstica nostra. Ca de sas 8.324 limbas peri su mundu bi nd’at paritzas chi diant pòdere iscumpàrrere. E nois diamus dèvere evitare custa possibilidade pro sa nostra».
Narant sos de s’Onu chi «sas limbas sunt essentziales pro s’istrutzione e s’isvilupu sustenìbile ca sunt su mèdiu printzipale pro ispàrghere connoschèntzias e pro amparare sas culturas». Galu: «Garantire chi sos sistemas educativos sustèngiant su diritu a s’imparu cun sa la limba materna est cosa fundamentale pro megiorare sos resurtados de s’aprendimentu». Serrende·la: «S’istrutzione multilìngue, mescamente pro sas limbas minoritàrias e de su logu, no agiudat a sos istudiantes ebbia, ma favorit fintzas unu ligàmene prus fundudu intre istrutzione e cultura, contribuende a sotziedades prus inclusivas e ècuas».
«Comente Unione de sos Comunes de su Monte Arvu – narat Ruju – nd’aprofitamus de custa ricurrèntzia pro cuntatare sas iscolas de su logu. S’istrutura nostra, cun sos operadores de s’Ufìtziu de sa limba sarda, est a disponimentu pro aprontare paris unas cantas initziativas comunes cun sa punna de s’amparu e de s’avaloramentu de custu patrimòniu culturale».
Leave a comment