de Salvatore Serra
Su putzu sacru de Funtana Coberta est unu fràigu chi nche torrat a su 1.200 a.C. e s’agatat in Ballao.
Sos iscavos, cumintzados in su 1918 dae Antonio Taramelli e torrados a cuminzare in su 1994 dae Maria Rosaria Manunza, ant permissu de istudiare su putzu e sas cosas de brunzu chi b’at in intro, comente ispadas pro giuramentos religiosos, lastras de metallu a “pedde de boe” e istatueddas.
S’istrutura e sa mannària de su putzu sunt simigiantes (e diant pòdere tènnere unu ligàmene) a su putzu sacru de Gărlo, un’istrutura in pedra chi nche torrat a su millènniu II a.C., imbènnida in Tràtzia (Bulgaria) in su giassu de su riu Struma, a curtzu a su mare Egeu.
Su templu, fraigadu cun pedras calcàreas segadas a forma de parallelepìpedos irregulares, est longu 10,60 m . Est formadu dae un’intrada retangulare de 1,90 m. de largària, dae un’iscala de 12 istradeddas in falada, cugugiadas dae su matessi nùmeru de architraves in falada, chi nche giughet a una cùpula farsa (thòlos), tunda in manera irregulare, arta 5,50 m. e lada in su fundu 3,50 m., cun unu pamentu e lastrones postos in tundu.
In su pamentu suta de sa cùpula, non pròpiu in mesu, b’est su gùturu de su putzu, cugugiadu dae 34 pedras, chi nch’isprufundat pro 5,20 m, cun una buca de 1,35 m., chi si reduit a 0,90 m. in su fundu istuvadu in sa roca, in ue b’at una bena. Sas istruturas pesadas in artu sunt como limitadas a su muru perimetrale a forma de frìschiu chi inserrat s’intrada e su tùmbaru de su putzu.
Leave a comment