Su giornalista tataresu Giovanni Seu at dedicadu unu libru a sa figura de Antonangelo Liori. S’autore at chircadu de isvelare su chi a pàrrere suo est su mistèriu rapresentadu dae un’òmine chi est istadu a su matessi tempus giornalista de èsitu, iscritore e cundennadu in diferentes protzessos.
Liori, desulesu de sa leva de su ‘64, est istadu nominadu diretore de s’Unione Sarda in su 1994 a trinta annos ebbia, dae s’editore de issara, Nicola Grauso.
Su càmbiu de diretzione polìtica, orientada a destra, e s’istile diretu e a bortas aferradore, de Liori, ant marcadu chimbe annos caraterizados dae sa contrariedade de una parte de sa redatzione chi no atzetaiat sa lìnia editoriale noa.
Sunt custos chimbe annos, forsis, chi indiritzant su destinu de Liori. A pustis de sas dimissiones sunt cumintzados sos problemas professionales, econòmicos e finas giuditziàrios de un’òmine chi at bìvidu diferentes esistèntzias: giornalista, iscritore e cultore de sas costumàntzias sardas, propietàriu de terrinos e de bestiàmene, impresàriu.
Seu provat a ofèrrere un’ispricatzione a su chi cunsìderat s’enigma de «un uomo in bilico tra il bene e il male», comente narat su tìtulu de unu de sos capìtulos, proponende una letura antropològica, ligada a su logu de orìgine de Liori, sa Sardigna tzentrale, e una psicològica, chi est acapiada finas a s’esperièntzia personale de s’ex diretore de s’Unione, passadu a piticu dae una bidda de monte a sa capitale de s’ìsula e, si podet nàrrere galu pitzocu, a sa diretzione de su cuotidianu.
S’autore at pregontadu a chie dd’at connotu bene chie est Antonangelo Liori. Intre custos Nicola Grauso, presèntzia fundamentale in sa vida de su protagonista de custa inchiesta. Duos sos momentos chi ant bidu diretore e editore paris in prima lìnia: su recùperu, finidu male, de sa carriera de Arbatassa, e sa fura de Silvia Melis, concruida cun sa libertade de sa furada e sa morte de su magistradu Lombardini.
Antonangelo L. Una vita spregiudicata, essidu in su 2022, est publicadu dae sa Edes.
(gianni muroni)
Leave a comment