Cun tema su de su mudamentu climàticu, su 13 de freàrgiu de ocannu ruet sa Die mundiale de sa Ràdiu, proclamada dae s’Unesco su 2011. In ocasione de custu avenimentu, Unica Radio (emitente universitària fundada su 2007 e gestida dae sos istudiantes) est organizende in su cabu de logu un’eventu ispetziale in collaboratzione cun sa facultade de Ingegneria e Architetura de s’Universidade de Casteddu. Sa punna est sa de pònnere in parte sos istudiantes de sas iscolas superiores cun unas cantas atividades dae s’istòria de sa ràdiu a sas tecnologias noas.
In riferimentu a su tema isseberadu ocannu, si cheret ammustrare s’importàntzia de custu mèdiu de comunicatzione pro sensibilizare s’opinione pùblica. «Sa ràdiu – narant sos organizadores de s’initziativa casteddaja –, mancari sa crèschida de sas retes sotziales e de s’intelligèntzia artifitziale, abbarrat unu mèdiu universale e fidadu, a tretu de lòmpere a unu pùblicu prus chi non mannu».
«Sa ràdiu – agiunghent sos de s’Unesco – podet contribuire a determinare s’agenda polìtica e a influentzare sa pertzetzione de su cambiamentu climàticu ispainende informatziones averguadas e indipendentes. Sas populatziones chi istant in sos logos chi sufrint sas cunsighèntzias cuncretas de custu cambiamentu, o sos chi ant connotu disacatos ambientales comente franas o alluviones, tenent una connoschèntzia direta de sos efetos de su fenòmenu e de sas solutziones possìbiles. Sas testimonias issoro diant pòdere èssere impreadas dae sas emitentes radiofònicas pro animare s’allega pùblica e pro chi autoridades e aziendas faeddent in contu de atziones e preitzas issoro».
S’eventu de oe comintzat a sas 9 in sa sede de sa facultade de Ingegneria in carrera de Marengo in Casteddu cun sos istudiantes chi, in prus de propònnere sa mùsica issoro, ant a animare atividades in contu de diritu de autore, de intelligèntzia artifitziale e de progetos radiofònicos in sas iscolas superiores.
Gianfranca Orunesu
(Foto de Unica Radio)
Leave a comment