Su mese de trìulas de s’annu coladu ant publicadu sos datos Istat in contu de intzidentes istradales de s’annu in antis. Sas pertzentuales tirant una fotografia de su chi b’acontesset peri sas istradas urbanas o extraurbanas: cun base 100, 8,4 sunt sas bortas chi sa cajone est determinada dae sa velotzidade e 12,9 sunt sas bias chi non damus sa pretzedèntzia. Ma su datu chi nos custringhet a meledare est su 15,1% de intzidentes determinados dae sa disatentzione.
Su telefoneddu a b’intrat? Craru chi emmo, ca sa disatentzione ingendrada dae s’impreu de su smartphone est moltèplitze. Est visiva, ca iscriende o leghende nde semus boghende sos ogros dae su caminu; sunt bastantes pagos segundos pro pèrdere su controllu de sas cunditziones de tràficu, de sa signalètica orizontale e verticale, de sos perìgulos repentinos.
Ma sa disatentzione est finamentas uditiva (pensemus a sas notìficas chi annùntziant sa lòmpida de unu messàgiu) e cognitiva (cando chi semus pensende a ite iscrìere o comente rispòndere a una cramada semus boghende atentzione a sa guida). Totu cunditziones chi impignant duncas sos ogros, sas origras, sa conca, ma fintzas sas manos chi devent gestire petzi volante, càmbiu e àteros cumandos.
Como b’amus carchi novidade chi pertocat s’impreu de s’intelligèntzia artifitziale. In Agliana, unu Comune toscanu in provìntzia de Pistoia, s’amministratzione locale at detzisu de pònnere una telecàmera ispetziale chi est a tretu de filmare chie impreat su telefoneddu guidende. Su dispositivu si narat “Mobile phone & Seat belt Detection” e tenet videocàmera a infrarujos. Sa risolutzione est arta cun funtzionamentu a de die e a de note, cun tempus bonu e malu.
S’aplicativu est annestradu pro chi rilevet sos cumportamentos chi non sunt ammìtidos dae su còdighe de s’istrada (fintzas sa tzintura chi no est posta). S’iscansione de s’immàgine est in tempus reale e su materiale foto-vìdeo est fatu-fatu imbiadu a sas autoridades chi isterrent su verbale a pustis de unu controllu issoro.
Gianfranca Orunesu
Leave a comment