Foto leada dae su situ ufitziale de su Ses Natziones
S’Irlanda, campione in càrriga, si cunfirmat s’iscuadra de bìnchere in custu torneu 2025. Su segundu turnu, cumintzadu sàbadu 8 cun Itàlia contra a Galles e Inghilterra contra a Frantza, bidet sos irlandesos solos in prima positzione.
In sa partida de Roma s’Itàlia at bintu a unu Galles chi non renesset a essire dae sa crisi. Sa vitòria est istada bastante neta. In su primu tempus sos dragones ant mancadu duas metas cun s’ala Adams chi no est resurtadu a controllare sa botza neghe puru de s’abba. A sa fine, cando totu pariat giai definidu, sos dragones ant marcadu duas metas a fila a pare, sa segunda tècnica, cosa chi at postu unu pagu in oriolu a sos giogadores italianos in sos ùrtimos minutos.
In Twickenham puru at pròidu. Est istada, finas a como, sa partida prus apassionante de custa editzione de su torneu. Sas duas iscuadras ant marcadu bator metas, leende su puntu de bonus ofensivu, marchende a borta a borta. Sos inglesos si sunt assegurados sa vitòria a s’ùrtimu minutu, cun una meta a suta de sos palos de Daly, a coa trasformada. Detzisivu su càmbiu de esecutore de sas punitziones e trasformatziones durante sa partida. A pustis de una pariga de errores de s’estremu Marcus Smith s’abertura Fin Smith, a sa prima comente titulare, at garantidu sos puntos detzisivos.
Domìniga 9 in Edimburgu sos irlandesos, chi si sunt assegurados su bonus ofensivu puru, no ant tentu tropu problemas contra a un’Iscòtzia penalizada dae duos infortùnios, giai in su primu tempus, de duos de sos òmines prus importantes: s’abertura Russell e s’ala destra Graham. Semper protagonistas pro sos giogadores in màllia birde sos neozelandesos ecuiparados, massimamente Lowe e Gibson-Park, e s’abertura Prendergast, chi cumintzat a leare in manu s’iscuadra.
Sos resurtados finales: Itàlia-Galles 22-15, Inghilterra- Frantza 26-25 e Iscòtzia-Irlanda 18-32.
(gianni muroni)
Leave a comment