Su nuraghe Oes est in su Meilogu, in su paris de Campu Giavesu a curtzu a su riu Mannu, in sa Badde de sos Nuraghes.
Est connotu mescamente pro sos caràteres costrutivos raros de sa turre printzipale, in ue b’at petzi una càmera a “tholos” partzida in tres ambientes dae bòvedas de linna mantesas dae resegas e istampos fatos in sas pinnas de muru.
Faghet parte de unu cumplessu in ue b’at un’antemurale frunidu de turres, un’àrea sacra – cun “temenos” e tempieddu “a megaron” – e, a fùrriu, un’insediamentu mannu.
Su monumentu est formadu dae una turre printzipale a ue s’imbarat unu bastione bilobadu a duos nivellos chi inserrat duas turres segundàrias e una corte.
A sa turre printzipale tunda (diàm. m 16,15; art. m 11,40) si bi lompet atraessu de su ventanone de su primu pranu chi si bi podet arribbare iscalende sa cortina murària de su bastione e su prenamentu de sa corte.
S’abertura, trapetzoidale (largh. m 0,80; art. m 2) e cun ventanedda de iscàrrigu, resurtat istesiada cara a sud. Su ventanone illùminat s’intrada de segus chi a mesu isvilupu est rugrada dae s’iscala elicoidale chi nche giughet a sos pranos de subra. Su percursu est iscraridu dae carpiduras e dae una casta de armarieddos pro bi pònnere lugherras. Un’àtera particularidade de s’ iscala est rapresentada dae sa presèntzia de unu nitzu-apartadòrgiu.
