Un’àtera acontèssida de ispionàgiu informàticu cun bersàllios giornalistas e ativistas est animende sas crònacas atuales.
Fiat su 2023 cando aìamus publicadu un’artìculu faeddende de Pegasus, unu spyware de casta militare fìgiu de s’azienda israeliana NSO Group. E como, a nos ammentare chi sa libertade est semper persighida dae sos opressores, b’est sa chistione de un’àteru aplicativu malèsigu chi l’ant agatadu interessende belle 90 persones pro su prus in Europa (7 sas italianas) e, mescamente, ativistas e giornalistas. Semus faeddende de Graphite, creatzione intrusiva de s’azienda Paragon Solutions chi, che a sa cuncurrèntzia NSO Group, est israeliana.
Ma ite b’at sutzessu? E pro ite nde sunt faghende unu casu polìticu? Cumintzemus ispieghende it’est Graphite e comente funtzionat; custu aplicativu malèsigu non tenet bisòngiu de peruna installatzione o interatzione: punnat, difatis, a un’atacu “zero-click”, est a nàrrere sena chi s’utente depat acumprire a carchi atzione comente incarcare unu ligàmene o abèrrere unu documentu. S’atacu si faghet logu pro mèdiu de vulnerabilidades in sos aplicativos installados in su telèfonu, ma finamentas debilesas in sos protocollos de comunicatzione e, identificada sa farta, sos agressores providint a imbiare unu pachete de datos o unu messàgiu pro l’isfrutare (pensemus a unu SMS o una cramada cun WhatsApp o iMessage); acò chi su dispositivu de sa vìtima est cumpromissu e s’autore de s’atacu podet monitorare sas atividades, ativare su micròfonu, furare informatziones sensìbiles, lèghere messàgios, ispiare sa fotocàmera e àteru meda. Finamentas in manera sighida e mancari su telèfono siat protetu dae tzifradura.
E como chi ischimus, a grussu, comente funtzionat unu spyware che a custu, pensemus a s’intzidente diplomàticu chi est capitende e immaginemus·nos ite est sufrende chie fiat in sa mìria de Graphite e de sos chi nd’ant cumandadu s’impreu isfrutende una vulnerabilidade de WhatsApp pro infetare sos dispositivos. WhatsApp matessi at provìdidu a avisare a sos interessados dae s’ispionàgiu aberende, naramus, su vasu de Pandora. In Itàlia, Graphite l’impreaiant un’azienda de intelligence e un’agentzia de politzia: Paragon nd’at bogadu s’autorizatzione pro s’impreu a ambas, trunchende sos raportos cun sa penìsula ca, pro su chi narat su Guardian, s’aplicativu l’ant tratadu pro ispiare sos tziviles.
Como su Citizen Lab de s’Universidade de Toronto, giai nòdidu pro sas chircas e s’impignu in contu de deretos in Internet, est traballende pro istudiare sa chistione e dare sa pretziosa collaboratzione sua.
Gianfranca Orunesu
(Foto de Tima Miroshnichenko)
Leave a comment